ଭଞ୍ଜନଗର/ବ୍ରହ୍ମପୁର (ସିଧା ସମ୍ବାଦ): ରାଜ୍ୟରେ ଦୁର୍ନୀତି ବିରୋଧରେ ଭିଜିଲାନ୍ସର ବଡ଼ ଧରଣର କାର୍ଯ୍ୟାନୁଷ୍ଠାନ। ଗଞ୍ଜାମ ଜିଲ୍ଲା ଭଞ୍ଜନଗର ଜଳସେଚନ ବିଭାଗ ଅଧୀନସ୍ଥ ଡ଼ହ ଜଳସେଚନ ବିଭାଗର ଏସଡିଓ ପଞ୍ଚୁ ବେହେରାଙ୍କ ଘରେ ଆଜି ଭିଜିଲାନ୍ସ ଟିମ୍ ପକ୍ଷରୁ ଚଢାଉ କରାଯାଇଛି। ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଏକକାଳୀନ ୫ଟି ସ୍ଥାନରେ ଏହି ରେଡ୍ ଜାରି ରହିଛି।
ବର୍ତ୍ତମାନ ସୁଦ୍ଧା ମିଳିଥିବା ସୂଚନା ଅନୁଯାୟୀ, ଏସଡିଓଙ୍କ ପାଖରୁ ବିପୁଳ ପରିମାଣର ନଗଦ ଟଙ୍କା ସହ କୋଟି କୋଟି ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଠାବ ହୋଇଛି:
-
ନଗଦ ଟଙ୍କା: ପୋଲସରାରେ ଥିବା ପୈତୃକ ଘରୁ ୧୮ ଲକ୍ଷ ୯୦ ହଜାର ୮୦୦ ଟଙ୍କା, ବସନ୍ତ ବିହାର ବାସଭବନରୁ ୧୫.୧୩ ଲକ୍ଷ ଏବଂ ଭଞ୍ଜନଗର ସରକାରୀ କ୍ୱାର୍ଟରରୁ ୩.୭୨ ଲକ୍ଷ ଟଙ୍କା ଜବତ କରାଯାଇଛି।
-
ଆଲିସାନ୍ କୋଠା ଓ ପ୍ଲଟ୍: ବ୍ରହ୍ମପୁର ବସନ୍ତ ବିହାରରେ ପ୍ରାୟ ୩୫୫୦ ବର୍ଗଫୁଟର ଏକ ବିଶାଳ ତିନିତଳ ପ୍ରାସାଦ। ଏହା ସହିତ ବ୍ରହ୍ମପୁର ସହର ଓ ଆଖପାଖ ଅଞ୍ଚଳରେ ୫ଟି ମୂଲ୍ୟବାନ ପ୍ଲଟ୍ ରହିଛି।
-
ଭାରି ଯନ୍ତ୍ରପାତି ଓ ଗାଡ଼ି: ୨୦୨୪ରେ କିଣାଯାଇଥିବା ୫୭ ଲକ୍ଷ ଟଙ୍କାର କ୍ରଙ୍କିଟ୍ ମିକ୍ସର ମେସିନ୍, ୨୦୨୫ରେ କିଣାଯାଇଥିବା ୩୭ ଲକ୍ଷ ଟଙ୍କାର ଏକ ଜେସିବି (JCB), ଗୋଟିଏ ଚାରିଚକିଆ ଗାଡ଼ି ଓ ୩ଟି ଦୁଇଚକିଆ ଯାନ।
-
ଅନ୍ୟାନ୍ୟ: ବ୍ୟାଙ୍କ ଓ ଡାକଘର ଜମା ସହ ସୁନା ଅଳଙ୍କାରର ଓଜନ ଏବଂ ମୂଲ୍ୟାୟନ ଜାରି ରହିଛି।
ଏହି ଚଢାଉରେ ଭିଜିଲାନ୍ସ ବିଭାଗର ୩ ଜଣ ଡ଼ିଏସପି, ୭ ଜଣ ଇନ୍ସପେକ୍ଟର ଏବଂ ଅନ୍ୟାନ୍ୟ କର୍ମଚାରୀ ସାମିଲ ଅଛନ୍ତି। ଭିଜିଲାନ୍ସର ଟେକ୍ନିକାଲ୍ ୱିଙ୍ଗ ଦ୍ୱାରା ଜବତ ହୋଇଥିବା ପ୍ଲଟ୍ ଓ ଘରର ସଠିକ୍ ମୂଲ୍ୟାୟନ କରାଯାଉଛି।
ବର୍ତ୍ତମାନ ସୁଦ୍ଧା ଖୋଳତାଡ଼ ଜାରି ରହିଥିବାରୁ ସମ୍ପତ୍ତିର ପରିମାଣ ଆହୁରି ବଢିବା ନେଇ ଅନୁମାନ କରାଯାଉଛି। ଏନେଇ ଅଧିକ ତଥ୍ୟ ପାଇଁ ଆମ ସହ ଯୋଡ଼ି ହୋଇ ରୁହନ୍ତୁ।
#SidhaSambad #VigilanceRaid #OdishaNews #CorruptionFreeOdisha #GanjamNews #Bhanjanagar #BreakingNews
