ନୂଆଦିଲ୍ଲୀ :: ଦିଲ୍ଲୀ ରାଜନୀତିରୁ ଏବେ ଏକ ବଡ଼ ଖବର ସାମ୍ନାକୁ ଆସୁଛି, ଯାହା ଆମ୍ ଆଦମୀ ପାର୍ଟି ପାଇଁ କୌଣସି ବଡ଼ ବିସ୍ଫୋରଣଠାରୁ କମ୍ ନୁହେଁ। ପାର୍ଟିର ତିନିଜଣ ପ୍ରଭାବଶାଳୀ ନେତା ତଥା ରାଜ୍ୟସଭା ସାଂସଦ ରାଘବ ଚଢା, ସନ୍ଦୀପ ପାଠକ ଏବଂ ଅଶୋକ ମିତ୍ତଲ ପାର୍ଟି ଛାଡ଼ିଥିବା ଚର୍ଚ୍ଚା ହେଉଛି।ଏହି ତିନି ନେତା ଆମ୍ ଆଦମୀ ପାର୍ଟିର ଚାଣକ୍ୟ ଭାବେ ଜଣାଶୁଣା ଥିଲେ। ବିଶେଷ କରି ରାଘବ ଚଢା ଏବଂ ସନ୍ଦୀପ ପାଠକ, ଯେଉଁମାନେ ପଞ୍ଜାବ ଏବଂ ଅନ୍ୟାନ୍ୟ ରାଜ୍ୟରେ ପାର୍ଟିର ବିଜୟ ପଛରେ ମୁଖ୍ୟ ଭୂମିକା ଗ୍ରହଣ କରିଥିଲେ, ସେମାନଙ୍କର ଏହି ନିଷ୍ପତ୍ତି କେଜ୍ରିୱାଲଙ୍କ ପାଇଁ ଏକ ବଡ଼ ଝଟକା। ତେବେ ଏହି ନେତାମାନେ କାହିଁକି ହଠାତ୍ ପାର୍ଟି ଛାଡିଲେ, ତାହାକୁ ନେଇ ଏବେ ସସପେନ୍ସ ଜାରି ରହିଛି। ଅନୁମାନ କରାଯାଉଛି କି, ପାର୍ଟି ଭିତରେ ଚାଲିଥିବା ଅନ୍ତଃକନ୍ଦଳ କିମ୍ବା ଆଦର୍ଶଗତ ମତଭେଦ ଯୋଗୁଁ ଏହି ବଡ଼ ଫାଟ ସୃଷ୍ଟି ହୋଇଛି।ଆଗକୁ ଦିଲ୍ଲୀରେ ନିର୍ବାଚନ ଥିବାବେଳେ, ଏଭଳି ହେଭିୱେଟ୍ ନେତାଙ୍କ ପାର୍ଟି ତ୍ୟାଗ ବିରୋଧୀଙ୍କୁ ବଡ଼ ସୁଯୋଗ ଦେଇଛି। ବିଜେପି ଏବଂ କଂଗ୍ରେସ ଏବେ ଆପ୍କୁ ଘେରିବା ପାଇଁ ରଣନୀତି ପ୍ରସ୍ତୁତ କଲେଣି। ଯଦି ଏହି ତିନି ନେତା ଅନ୍ୟ କୌଣସି ଦଳରେ ଯୋଗ ଦିଅନ୍ତି, ତେବେ ଦିଲ୍ଲୀ ଓ ପଞ୍ଜାବର ରାଜନୈତିକ ସମୀକରଣ ସମ୍ପୂର୍ଣ୍ଣ ବଦଳିଯିବ। ଏହା କେବଳ ଇସ୍ତଫା ନୁହେଁ, ବରଂ ଆମ୍ ଆଦମୀ ପାର୍ଟିର ଭବିଷ୍ୟତ ଉପରେ ଏକ ବଡ଼ ପ୍ରଶ୍ନବାଚୀ। କଣ ଏହି ସଙ୍କଟରୁ ପାର୍ଟିକୁ ରକ୍ଷା କରିପାରିବେ ଅରବିନ୍ଦ କେଜ୍ରିୱାଲ?
