ଛାଡ଼ପତ୍ର ମାମଲାରେ ଲୋକ ଅଦାଲତ ଓ ଜିଲ୍ଲା ଆଇନ ସେବା ପ୍ରାଧୀକରଣ ରାୟ ଦେଇପାରିବେ ନାହିଁ। ଏଭଳି ଏକ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି ଆହ୍ଲାବାଦ ହାଇକୋର୍ଟଙ୍କ ଲକ୍ଷ୍ନୌ ଖଣ୍ଡପୀଠ।
ଛାଡ଼ପତ୍ର ସମ୍ପର୍କିତ ମାମଲାରେ ରାୟ ପ୍ରଦାନ କରିବାର କ୍ଷମତା କେବଳ ପରିବାର ଅଦାଲତଙ୍କର ରହିଛି। ଲୋକ ଅଦାଲତ କିମ୍ବା ଜିଲ୍ଲା ଆଇନ ସେବା ପ୍ରାଧୀକରଣ କେବଳ ପକ୍ଷଦ୍ୱୟଙ୍କ ମଧ୍ୟରେ ସମାଧାନ ଓ ମିଳାମିଶା ପାଇଁ ପ୍ରୟାସ କରିପାରିବେ, କିନ୍ତୁ ବିବାହ ବିଚ୍ଛେଦ ନେଇ ଅନ୍ତିମ ନିଷ୍ପତ୍ତି ଦେଇପାରିବେ ନାହିଁ।
ଆହ୍ଲାବାଦ ହାଇକୋର୍ଟଙ୍କ ଲକ୍ଷ୍ନୌ ଖଣ୍ଡପୀଠ ୨୦୧୮ ମସିହାରେ ଉନ୍ନାଓ ଜିଲ୍ଲା ଆଇନ ସେବା ପ୍ରାଧୀକରଣ ଦ୍ୱାରା ଜାରି ହୋଇଥିବା ଏକ ଛାଡ଼ପତ୍ର ଆଦେଶକୁ ଅବୈଧ ଘୋଷଣା କରିଛନ୍ତି। ଏହି ଆଦେଶକୁ ଚ୍ୟାଲେଞ୍ଜ କରି ଜଣେ ମହିଳା ହାଇକୋର୍ଟର ଦ୍ୱାରସ୍ଥ ହୋଇଥିଲେ।
ମାମଲାର ଶୁଣାଣି କରି ଜଷ୍ଟିସ ଶେଖର ବି. ଶରାଫ ଓ ଜଷ୍ଟିସ ଏ.କେ. ଚୌଧାରୀଙ୍କ ଖଣ୍ଡପୀଠ କହିଛନ୍ତି, ଆଇନ ସେବା କର୍ତ୍ତୃପକ୍ଷ ଆଇନ-୧୯୮୭ ଏବଂ ଜାତୀୟ ଆଇନ ସେବା ପ୍ରାଧୀକରଣର ନିୟମାବଳୀ ଅନୁଯାୟୀ ବିବାହ ବିଚ୍ଛେଦ ଭଳି ବିଷୟରେ ଲୋକ ଅଦାଲତ ରାୟ ଦେଇପାରିବେ ନାହିଁ।
ହାଇକୋର୍ଟଙ୍କ ଏହି ରାୟ ପରେ ଛାଡ଼ପତ୍ର ସମ୍ପର୍କିତ ମାମଲାରେ ଲୋକ ଅଦାଲତ ଓ ଡିଏଲ୍ଏସ୍ଏର ଭୂମିକା କେବଳ ସମାଧାନକାରୀ ସଂସ୍ଥା ଭାବେ ସୀମିତ ରହିବ ବୋଲି ସ୍ପଷ୍ଟ ହୋଇଛି।
