ଆନ୍ଦୋଳନରତ ଛାତ୍ର ଓ ଯୁବ କାର୍ଯ୍ୟକର୍ତ୍ତାଙ୍କ ବିରୋଧରେ ରୁଜୁ ହୋଇଥିବା ସମସ୍ତ ଏଫ୍ଆଇଆର୍ (FIR) ତୁରନ୍ତ ପ୍ରତ୍ୟାହାର ନହେଲେ ପୁନର୍ବାର ଦେଶବ୍ୟାପୀ ବଡ଼ ଧରଣର ଆନ୍ଦୋଳନ କରାଯିବ ବୋଲି ଚେତାବନୀ ଦେଇଛି ‘କାକରୋଚ୍ ଜନତା ପାର୍ଟି’ (CJP)। ସୋମବାର ଦଳ ପକ୍ଷରୁ ସରକାରଙ୍କୁ ଏହି କଡ଼ା ଚେତାବନୀ ଦିଆଯାଇଛି।
ପରୀକ୍ଷା ଅନିୟମିତତା ଓ ଯୁବ ସମସ୍ୟାକୁ ନେଇ ଚାଲିଥିବା ବିକ୍ଷୋଭ ସମୟରେ ଅନେକ ଛାତ୍ରଙ୍କ ନାମରେ ପୋଲିସ ମାମଲା ରୁଜୁ କରିଥିଲା। ଏହି ଆଇନଗତ କାର୍ଯ୍ୟାନୁଷ୍ଠାନ ଯୁବପିଢ଼ିଙ୍କ ଭବିଷ୍ୟତ ଓ କ୍ୟାରିୟରକୁ ପ୍ରଭାବିତ କରୁଥିବାରୁ ସମସ୍ତ ମାମଲାକୁ ବିନା ସରତ୍ତିରେ ରଦ୍ଦ କରିବାକୁ ଦାବି କରାଯାଇଛି।
ପାର୍ଟିର ପ୍ରତିନିଧିମାନେ ଅଭିଯୋଗ କରିଛନ୍ତି ଯେ, ଗଣତାନ୍ତ୍ରିକ ଢଙ୍ଗରେ ନିଜର ଦାବି ଉପସ୍ଥାପନ କରୁଥିବା ଯୁବକମାନଙ୍କ ସ୍ୱରକୁ ଚପାଇବା ପାଇଁ ମାମଲା ରୁଜୁ କରାଯାଉଛି। ଯଦି ସରକାର ଏହି ଦାବି ପ୍ରତି ସମ୍ବେଦନଶୀଳ ନହୁଅନ୍ତି, ତେବେ ଆଗାମୀ ଦିନରେ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ସ୍ପଷ୍ଟ କରାଯାଇଛି।
