ଭୁବନେଶ୍ୱର: ରାଜଧାନୀ ଭୁବନେଶ୍ୱରର ରୋଡ୍ସ ଆଣ୍ଡ ବିଲ୍ଡିଂସ୍ (R&B) ଡିଭିଜନ୍-୧ କାର୍ଯ୍ୟାଳୟରେ ସରକାରୀ ଅର୍ଥ ହେରଫେର ଅଭିଯୋଗକୁ ନେଇ ବଡ଼ କାର୍ଯ୍ୟାନୁଷ୍ଠାନ କରିଛି ଓଡ଼ିଶା ଭିଜିଲାନ୍ସ।
ଭିଜିଲାନ୍ସ ତଦନ୍ତ ଅନୁସାରେ, ୨୦୨୨-୨୩ରୁ ୨୦୨୫-୨୬ ଆର୍ଥିକ ବର୍ଷ ମଧ୍ୟରେ ୯ କୋଟି ୨୪ ଲକ୍ଷ ୧୦ ହଜାର ୧୯୩ ଟଙ୍କା ସରକାରୀ ଅର୍ଥ ହେରଫେର ହୋଇଥିବା ଅଭିଯୋଗ ରହିଛି।
ଏହି ମାମଲାରେ ସେକ୍ସନ ଅଫିସର ବନଲତା ମହାନ୍ତି ଏବଂ ଜୁନିୟର ଆସିଷ୍ଟାଣ୍ଟ ବିଭୁଦତ୍ତ ନାୟକଙ୍କୁ ଭିଜିଲାନ୍ସ ଅଭିଯୁକ୍ତ କରିଛି। ତଦନ୍ତ ଅନୁସାରେ, ଅଜଣା ସହଯୋଗୀଙ୍କ ସହ ମିଶି ନକଲି ସାଙ୍କସନ୍ ଅର୍ଡର ଓ ବିଲ୍ ପ୍ରସ୍ତୁତ କରାଯାଇଥିବା ଅଭିଯୋଗ ହୋଇଛି।
ଅବସରପ୍ରାପ୍ତ କର୍ମଚାରୀଙ୍କ ପ୍ରୋଭିଜନାଲ ଗ୍ରାଚୁଇଟି, ଅବ୍ୟବହୃତ ଛୁଟି ବେତନ ଏବଂ ଅଫିସ୍ କଣ୍ଟିଜେନ୍ସି ଫଣ୍ଡ ସମ୍ପର୍କିତ ନକଲି ଦାବି ଜରିଆରେ ଟଙ୍କା ଉଠାଯାଇଥିବା ଭିଜିଲାନ୍ସ ତଦନ୍ତରେ କହିଛି। ଏହି ବିଲ୍ଗୁଡ଼ିକୁ IFMSରେ ଅନଧିକୃତ ଭାବେ ପ୍ରକ୍ରିୟାକରଣ କରାଯାଇଥିବା ଅଭିଯୋଗ ମଧ୍ୟ ରହିଛି।
ଭିଜିଲାନ୍ସ ଅନୁସାରେ, ପ୍ରକୃତ ବିଲ୍ରେ ଥିବା ବ୍ୟାଙ୍କ ତଥ୍ୟ ପରିବର୍ତ୍ତନ କରି ୪୮ ଜଣଙ୍କ ୭୭ଟି ବ୍ୟାଙ୍କ ଆକାଉଣ୍ଟକୁ ଟଙ୍କା ପଠାଯାଇଥିବା ଅଭିଯୋଗ ହୋଇଛି। ଏଥିରେ ଅଭିଯୁକ୍ତଙ୍କ ସମ୍ପର୍କୀୟ, ପରିଚିତ, ପୁଅ ଓ ଡ୍ରାଇଭରଙ୍କ ଆକାଉଣ୍ଟ ମଧ୍ୟ ଥିବା ଭିଜିଲାନ୍ସ କହିଛି।
ତଦନ୍ତ ଆରମ୍ଭ ହେବା ପରେ ପ୍ରଶାସନିକ କର୍ତ୍ତୃପକ୍ଷଙ୍କ ଦ୍ୱାରା ୩.୯୬ କୋଟି ଟଙ୍କା ଫେରସ୍ତ/ଉଦ୍ଧାର କରାଯାଇଥିବା ସୂଚନା ମିଳିଛି।
ଏହି ଘଟଣାରେ ଭୁବନେଶ୍ୱର ଭିଜିଲାନ୍ସ ଥାନା କେସ୍ ନମ୍ବର ୨୧, ତାରିଖ ୨୫ ସେପ୍ଟେମ୍ବର ୨୦୨୬ରେ Prevention of Corruption Act, 1988 ଏବଂ BNS, 2023ର ବିଭିନ୍ନ ଧାରାରେ ମାମଲା ରୁଜୁ ହୋଇଛି।
