ଖଣ୍ଡପଡ଼ା ପଠାଣି ସାମନ୍ତ ମହାବିଦ୍ୟାଳୟରେ ଛାତ୍ର ସଂସଦ ନିର୍ବାଚନ ବାତିଲ: କଲେଜ ଗେଟ୍ ସମ୍ମୁଖରେ ଛାତ୍ର ବିଜେଡ଼ିର ଧାରଣା, ଚାପା ଉତ୍ତେଜନା
ଖଣ୍ଡପଡ଼ା, ୦୯/୧୦ (ସିଧା ସମ୍ବାଦ): ନୟାଗଡ଼ ଜିଲ୍ଲା ଖଣ୍ଡପଡ଼ାସ୍ଥିତ ପ୍ରସିଦ୍ଧ ପଠାଣି ସାମନ୍ତ ମହାବିଦ୍ୟାଳୟରେ ଛାତ୍ର ସଂସଦ ନିର୍ବାଚନ ବାତିଲକୁ ନେଇ ଗମ୍ଭୀର ଅସନ୍ତୋଷ ପ୍ରକାଶ ପାଇଛି। ଜିଲ୍ଲା ପ୍ରଶାସନ ପକ୍ଷରୁ ହଠାତ୍ ନିର୍ବାଚନ ବନ୍ଦ ନେଇ ଘୋଷଣା କରାଯିବା ପରେ ଛାତ୍ର ନେତା ଓ ଛାତ୍ରଛାତ୍ରୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ଦେଖାଦେଇଛି।
ପ୍ରଶାସନର ନିଷ୍ପତ୍ତି ଓ ନାମାଙ୍କନ ଦାଖଲ
ଶୁକ୍ରବାର ଅପରାହ୍ନରେ ଜିଲ୍ଲା ପ୍ରଶାସନ ପକ୍ଷରୁ ନିର୍ବାଚନ ବନ୍ଦ ସଂକ୍ରାନ୍ତୀୟ ଏକ ନିର୍ଦ୍ଦେଶନାମା ଜାରି କରାଯାଇଥିବା ନେଇ ମହାବିଦ୍ୟାଳୟର ଅଧ୍ୟକ୍ଷା ଡ. ସ୍ୱଚ୍ଛ ସଲୀଳା ମହାପାତ୍ର ସୂଚନା ଦେଇଛନ୍ତି। ତେବେ ଛାତ୍ର ବିଜେଡ଼ି ପକ୍ଷରୁ ମିଳିଥିବା ଅଭିଯୋଗ ଅନୁଯାୟୀ, ଆଜି ପୃଥକ ଭାବେ ବିଭିନ୍ନ ସଂଗଠନର ଛାତ୍ର ନେତାମାନେ ନିଜ ନିଜର ନାମାଙ୍କନପତ୍ର ଦାଖଲ କରିସାରିଥିଲେ। ଶାସକ ଦଳ ସମର୍ଥିତ ପ୍ରାର୍ଥୀଙ୍କ ପକ୍ଷରୁ ନାମାଙ୍କନ ଦାଖଲ ସରିବା ପରେ ହଠାତ୍ ଅପରାହ୍ନରେ ମହାବିଦ୍ୟାଳୟ କର୍ତ୍ତୃପକ୍ଷ ନିର୍ବାଚନ ବାତିଲ ଘୋଷଣା କରିଥିଲେ।
ମୁଖ୍ୟ ଫାଟକ ସମ୍ମୁଖରେ ଧାରଣା ଓ ଉତ୍ତେଜନା
ଏହି ନିଷ୍ପତ୍ତି ବିରୋଧରେ ଛାତ୍ର ବିଜେଡ଼ି ସଭାପତି ବିକ୍ରମ ପ୍ରଧାନ, ଯୁବ ସଭାପତି ମନୋରଞ୍ଜନ ବେହେରାଙ୍କ ସମେତ ନାମାଙ୍କନପତ୍ର ଦାଖଲ କରିଥିବା ଅନେକ ଛାତ୍ର ନେତା ମହାବିଦ୍ୟାଳୟ କର୍ତ୍ତୃପକ୍ଷଙ୍କୁ କୈଫୟତ ମାଗିଥିଲେ। ଏଥିସହ ମହାବିଦ୍ୟାଳୟର ମୁଖ୍ୟ ଫାଟକ ସମ୍ମୁଖରେ ଧାରଣାରେ ବସି ନିର୍ବାଚନ କରାଇବାକୁ ଦାବି କରିଥିଲେ। ଫଳରେ କଲେଜ ପରିସରରେ ଚାପା ଉତ୍ତେଜନା ସୃଷ୍ଟି ହୋଇଥିଲା।
ପୋଲିସ ଓ କର୍ତ୍ତୃପକ୍ଷଙ୍କ ବୁଝାସୁଝା
ଖବର ପାଇ ଖଣ୍ଡପଡ଼ା ଏସଡିପିଓ (SDPO) ସରୋଜ କୁମାର ସାହୁ ସଦଳବଳେ ଘଟଣାସ୍ଥଳରେ ପହଞ୍ଚି ଉତ୍ୟକ୍ତ ଛାତ୍ର ନେତା ଓ ସଂଗଠନର ସଦସ୍ୟମାନଙ୍କୁ ବୁଝାସୁଝା କରିଥିଲେ। ପରେ ସନ୍ଧ୍ୟାରେ ମହାବିଦ୍ୟାଳୟର ଅଧ୍ୟକ୍ଷାଙ୍କ ନେତୃତ୍ୱରେ ଏକ ଟିମ୍ ଧାରଣାରତ ଛାତ୍ରଛାତ୍ରୀଙ୍କୁ ଭେଟି ଦୀର୍ଘ ସମୟ ବୁଝାସୁଝା କରିବା ପରେ ଆଜି ପାଇଁ ଧାରଣା ପ୍ରତ୍ୟାହୃତ ହୋଇଥିଲା।
ଶନିବାର ପୁଣି ଧାରଣା ଦେବାକୁ ଚେତାବନୀ
ଧାରଣା ପ୍ରତ୍ୟାହୃତ ହୋଇଥିଲେ ମଧ୍ୟ ଆସନ୍ତାକାଲି ଶନିବାର ପୁଣି ଥରେ ବିଜୁ ଛାତ୍ର ଜନତା ଦଳ ସମର୍ଥିତ ଛାତ୍ରଛାତ୍ରୀମାନେ ମହାବିଦ୍ୟାଳୟ ସମ୍ମୁଖରେ ଧାରଣାରେ ବସିବେ ବୋଲି ବିଶେଷ ସୂତ୍ରରୁ ସୂଚନା ମିଳିଛି।
