ନୂଆଦିଲ୍ଲୀ/ଭୁବନେଶ୍ୱର, ୧୮ ଅକ୍ଟୋବର (ସିଧା ସମ୍ବାଦ କଳିଙ୍ଗ):
କୋକ୍ରୋଚ୍ ଜନତା ପାର୍ଟିର (CJP) ସହ-ଆବାହକ ସୌରଭ ଦାସ ଏବଂ ଆଶୁତୋଷ ରଙ୍କାଙ୍କ ପାଞ୍ଚ ଦିନିଆନ୍ୟାୟିକ ହାଜତ ଶନିବାର ଦିନ ଶେଷ ହୋଇଥିବା ବେଳେ ଦିଲ୍ଲୀ ପୋଲିସ ପକ୍ଷରୁ କୌଣସି ବର୍ଦ୍ଧିତ ଆବେଦନ କରାଯାଇ ନଥିବାରୁ ସେମାନେ ମୁକ୍ତ ହେବା ସମ୍ଭାବନା ରହିଛି। CJP ର ଆଇନଗତ ବ୍ୟାପାର ମୁଖ୍ୟ ରତ୍ନ ସିଂହଙ୍କ କହିବା ଅନୁଯାୟୀ, ଆବଶ୍ୟକୀୟ ସମସ୍ତ ପ୍ରକ୍ରିୟା ସମ୍ପୂର୍ଣ୍ଣ ହୋଇସାରିଛି ଏବଂ କେବଳ ଆନୁଷ୍ଠାନିକ ଅନୁମୋଦନକୁ ଅପେକ୍ଷା କରାଯାଇଛି। ତଥାପି, ଯଦି ଆଜି ସେମାନଙ୍କୁ ମୁକ୍ତ କରା ନଯାଏ, ତେବେ ଦଳ ପକ୍ଷରୁ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି। ବରିଷ୍ଠ ଆଇନଜ୍ଞ କପିଲ ସିବଲଙ୍କ ସହ ପରାମର୍ଶ କରାଯାଇଥିବା ପ୍ରକାଶ କରି CJP ଅଭିଯୋଗ କରିଛି ଯେ, ସୌରଭ ଦାସ ଓ ଆଶୁତୋଷ ରଙ୍କାଙ୍କୁ ଜେଲରେ ଅଟକାଇ ରଖିବା ପାଇଁ ଜାଣିଶୁଣି ବିଳମ୍ବ କରିବାର କୌଶଳ ଆପଣାଯାଉଛି।
ଅନ୍ୟପକ୍ଷରେ, ‘ଲେହରା ଦୋ ତିରଙ୍ଗା’ ପଦଯାତ୍ରା ବେଳେ ଅଟକ ଓ ଗିରଫ ହୋଇଥିବା CJP ପ୍ରତିଷ୍ଠାତା ଅଭିଜିତ୍ ଦିପ୍କେ ଶନିବାର ଦିନ ସର୍ତ୍ତମୂଳକ ଜାମିନରେ ମୁକ୍ତ ହୋଇଛନ୍ତି। ତାଙ୍କ ଜାମିନର ମୁଖ୍ୟ ସର୍ତ୍ତଗୁଡ଼ିକ ମଧ୍ୟରୁ ଗୋଟିଏ ହେଉଛି ଯେ, ଆଗାମୀ ଗୋଟିଏ ବର୍ଷ ପର୍ଯ୍ୟନ୍ତ ତାଙ୍କ ପକ୍ଷରୁ କୌଣସି ପ୍ରକାର ଶାନ୍ତିଭଙ୍ଗ କରାଯିବ ନାହିଁ। ସେହିପରି AISA ଜାତୀୟ ସଭାପତି ନେହା ବୋରାଙ୍କୁ ମଧ୍ୟ ଶୁକ୍ରବାର ଦିନ ଅଟକ ରଖାଯାଇଥିଲା ଏବଂ ଦିଲ୍ଲୀ ପୋଲିସ ଆଇନର ଧାରା ୬୫ ଅନ୍ତର୍ଗତ ଆନୁଷ୍ଠାନିକ ପ୍ରକ୍ରିୟା ପରେ ରାତିସାରା ଅଟକ ପରେ ତାଙ୍କୁ ମୁକ୍ତ କରାଯାଇଥିଲା।
ନିର୍ବାଚନ ଆୟୋଗଙ୍କ ସ୍ୱତନ୍ତ୍ର ନିବିଡ଼ ସଂଶୋଧନ (SIR) ଅଭିଯାନ ଏବଂ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ CJP, ବିଭିନ୍ନ ଛାତ୍ର ସଙ୍ଗଠନ ଏବଂ ବିରୋଧୀ ଦଳଗୁଡ଼ିକ କ୍ରମାଗତ ଭାବେ ବିକ୍ଷୋଭ ପ୍ରଦର୍ଶନ କରିଆସୁଛନ୍ତି। ଅନ୍ୟପକ୍ଷରେ, ନିର୍ବାଚନ ଆୟୋଗ ଏକ ବିବୃତ୍ତିରେ ସ୍ପଷ୍ଟ କରିଛନ୍ତି ଯେ ସେମାନଙ୍କ ଦ୍ୱାରା ନିଆଯାଇଥିବା ସମସ୍ତ ନିଷ୍ପତ୍ତି ସର୍ବସମ୍ମତିକ୍ରମେ ଗୃହୀତ ହୋଇଛି।
