ଭୁବନେଶ୍ୱର: ଓଡ଼ିଶା ଗସ୍ତରେ ଆସି ଶିକ୍ଷା ଓ ସେବାର ପେଣ୍ଠସ୍ଥଳ କିଟ୍ (KIIT) ଓ କିସ୍ (KISS) କ୍ୟାମ୍ପସରେ ପହଞ୍ଚିଛନ୍ତି ରିଲାଏନ୍ସ ଫାଉଣ୍ଡେସନର ପ୍ରତିଷ୍ଠାତା ତଥା ଚେୟାରପର୍ସନ ନୀତା ଅମ୍ବାନୀ। ଏହି ଅବସରରେ ତାଙ୍କୁ ୨୦୨୫ ବର୍ଷ ପାଇଁ ପ୍ରତିଷ୍ଠିତ ‘କିସ୍ ହ୍ୟୁମାନିଟାରିଆନ୍ ସମ୍ମାନ’ (KISS Humanitarian Award) ପ୍ରଦାନ କରାଯିବ।
ନୀତା ଅମ୍ବାନୀଙ୍କ ଆଗମନ ପୂର୍ବରୁ ତାଙ୍କ କାରକେଡ ଟିମ୍ କ୍ୟାମ୍ପସରେ ପହଞ୍ଚି ସୁରକ୍ଷା ବ୍ୟବସ୍ଥାର ଯାଞ୍ଚ କରିଥିଲେ। ବିମାନବନ୍ଦରରୁ ସିଧାସଳଖ KIIT କୁ ଆସିବା ପରେ ସେଠାରେ ତାଙ୍କୁ ଭବ୍ୟ ସମ୍ବର୍ଦ୍ଧନା ଦିଆଯାଇଥିଲା। ଓଡ଼ିଶାର ପରମ୍ପରାକୁ ସମ୍ମାନ ଜଣାଇ ସେ ‘ଜୟ ଜଗନ୍ନାଥ’ କହି ସମସ୍ତଙ୍କୁ ସମ୍ବୋଧନ କରିଥିଲେ।
ପରିଦର୍ଶନ ସମୟରେ ନୀତା ଅମ୍ବାନୀ ଓଡ଼ିଶାର ହସ୍ତତନ୍ତ ଓ ଶାଢ଼ୀର ଭୂୟସୀ ପ୍ରଶଂସା କରିଥିଲେ। ଏଥିସହ ସେ କିଟ୍ ବିଶ୍ୱବିଦ୍ୟାଳୟର ପରିବେଶକୁ ‘ମିନି ଇଣ୍ଡିଆ’ (Mini India) ସହ ତୁଳନା କରିଥିଲେ। ଦେଶର ବିଭିନ୍ନ ପ୍ରାନ୍ତରୁ ଆସିଥିବା ଛାତ୍ରଛାତ୍ରୀ ଏଠାରେ ଏକାଠି ପାଠ ପଢୁଥିବାରୁ ଏହା ଏକ କ୍ଷୁଦ୍ର ଭାରତର ଭ୍ରମ ସୃଷ୍ଟି କରୁଛି ବୋଲି ସେ କହିଛନ୍ତି।
ନୀତା ଅମ୍ବାନୀ ଛାତ୍ରଛାତ୍ରୀଙ୍କ ଗହଣକୁ ଯାଇ ସେମାନଙ୍କ ସହ କଥାବାର୍ତ୍ତା କରିଥିଲେ। ପାଠପଢ଼ା କିଭଳି ଚାଲିଛି ଏବଂ ସେମାନଙ୍କର ଲକ୍ଷ୍ୟ କ’ଣ ସେ ବିଷୟରେ ପଚାରି ବୁଝିଥିଲେ। ପିଲାମାନଙ୍କ ସହ ସେ ଫଟୋ ମଧ୍ୟ ଉଠାଇଥିଲେ, ଯାହା ଛାତ୍ରଛାତ୍ରୀଙ୍କ ମଧ୍ୟରେ ଅନେକ ଉତ୍ସାହ ଭରିଦେଇଥିଲା।
୨୦୦୮ ମସିହାରୁ ଏହି ଆନ୍ତର୍ଜାତୀୟ ସମ୍ମାନ ମାନବ ସେବାରେ ନିଷ୍ଠାର ସହ ନିୟୋଜିତ ବ୍ୟକ୍ତି କିମ୍ବା ସଂଗଠନକୁ ପ୍ରଦାନ କରାଯାଉଛି। ରିଲାଏନ୍ସ ଫାଉଣ୍ଡେସନ ମାଧ୍ୟମରେ ଶିକ୍ଷା, ସ୍ୱାସ୍ଥ୍ୟ ଓ ସମାଜସେବା କ୍ଷେତ୍ରରେ ନୀତା ଅମ୍ବାନୀଙ୍କର ଅନନ୍ୟ ଅବଦାନ ପାଇଁ ତାଙ୍କୁ ୨୦୨୫ ବର୍ଷର ଏହି ସମ୍ମାନ ପାଇଁ ମନୋନୀତ କରାଯାଇଛି।
ଏହି କାର୍ଯ୍ୟକ୍ରମରେ କିଟ୍ ଓ କିସ୍ର ପ୍ରତିଷ୍ଠାତା ଡକ୍ଟର ଅଚ୍ୟୁତ ସାମନ୍ତଙ୍କ ସମେତ ବିଶ୍ୱବିଦ୍ୟାଳୟର ବହୁ ବରିଷ୍ଠ କର୍ମକର୍ତ୍ତା ଉପସ୍ଥିତ ରହିଥିଲେ।
