ଭାରତୀୟ ଜନତା ପାର୍ଟି (ବିଜେପି)ର ରାଷ୍ଟ୍ରୀୟ ପ୍ରବକ୍ତା ଶେହଜାଦ୍ ପୁନାୱାଲାଙ୍କୁ ନେଇ ଦେଶର ରାଜନୈତିକ ଗଲିଆରାରେ ଏବେ ଜୋରଦାର ଚର୍ଚ୍ଚା। ସୋସିଆଲ୍ ମିଡିଆ ପ୍ଲାଟଫର୍ମ X (ପୂର୍ବରୁ ଟ୍ୱିଟର)ରେ ନିଜ ପ୍ରୋଫାଇଲ୍ ବାୟୋ ବଦଳାଇବା ପରେ ସେ ଦଳରୁ ଇସ୍ତଫା ଦେଇଥିବା ନେଇ ଅଟକଳ ତେଜିବାରେ ଲାଗିଛି। ତେବେ ପାର୍ଟି କିମ୍ବା ଶେହଜାଦଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ଘୋଷଣା କରାଯାଇନାହିଁ। ଆସନ୍ତୁ ନଜର ପକାଇବା ସମ୍ପୂର୍ଣ୍ଣ ରିପୋର୍ଟ ଉପରେ…
ଟେଲିଭିଜନ୍ ଡିବେଟ୍ରେ ବିଜେପିର ଏକ ପ୍ରମୁଖ ଓ ସକ୍ରିୟ ଚେହେରା ଭାବେ ଜଣାଶୁଣା ଶେହଜାଦ୍ ପୁନାୱାଲା। ନିକଟରେ ସେ ନିଜର X (ଟ୍ୱିଟର) ପ୍ରୋଫାଇଲ୍ ବାୟୋରୁ ବିଜେପି ରାଷ୍ଟ୍ରୀୟ ପ୍ରବକ୍ତା ପଦବୀ ହଟାଇ ଦେଇଛନ୍ତି। ନୂଆ ବାୟୋରେ ସେ ନିଜକୁ “ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆଜୀବନ ଅନୁଗାମୀ” (Lifelong follower of PM Narendra Modi) ବୋଲି ଉଲ୍ଲେଖ କରିଛନ୍ତି।
ସୂତ୍ର ଅନୁଯାୟୀ, ଶେହଜାଦ୍ ବ୍ୟକ୍ତିଗତ କାରଣ ଦର୍ଶାଇ ପାର୍ଟିର ଶୀର୍ଷ ନେତୃତ୍ୱଙ୍କୁ ନିଜର ଇସ୍ତଫା ପତ୍ର ପଠାଇ ସାରିଛନ୍ତି। ଗତ କିଛି ଦିନ ହେବ ସେ ସୋସିଆଲ୍ ମିଡିଆରେ କିଛି ଭିଡିଓ କ୍ଲିପ୍ ସେୟାର କରି ସକ୍ରିୟ ରାଜନୀତିରୁ ଓହରିଯିବାର ସଙ୍କେତ ଦେଉଥିଲେ।
ଉଲ୍ଲେଖଯୋଗ୍ୟ ଯେ, ୨୦୧୭ ମସିହାରେ କଂଗ୍ରେସ ଅଧ୍ୟକ୍ଷ ନିର୍ବାଚନ ପ୍ରକ୍ରିୟାକୁ ନେଇ ବିବାଦ ପରେ ସେ କଂଗ୍ରେସ ଛାଡ଼ି ବିଜେପିରେ ଯୋଗ ଦେଇଥିଲେ। ବିଜେପିରେ ସାମିଲ ହେବା ପରେ ତାଙ୍କୁ ରାଷ୍ଟ୍ରୀୟ ପ୍ରବକ୍ତା ଦାୟିତ୍ୱ ଦିଆଯାଇଥିଲା। ଏବେ ତାଙ୍କର ଏହି ନିଷ୍ପତ୍ତିକୁ ନେଇ ଜାତୀୟ ରାଜନୀତିରେ ଭିନ୍ନ ଭିନ୍ନ ଚର୍ଚ୍ଚା ଆରମ୍ଭ ହୋଇଛି।
