(ସିଧାସମ୍ବାଦ);ନୂଆଦିଲ୍ଲୀର ବିଜ୍ଞାନ ଭବନରେ ବିଦ୍ୟାଳୟ ସହିତ ଅଙ୍ଗନବାଡି କେନ୍ଦ୍ରଗୁଡ଼ିକର ସହ-ଅବସ୍ଥିତି ପାଇଁ ନିର୍ଦ୍ଦେଶାବଳୀ ଜାରି କରାଯାଇଛି। କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରୀ ଅନ୍ନପୂର୍ଣ୍ଣା ଦେବୀ ଏବଂ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଉପସ୍ଥିତ ରହି 
ଉଭୟ ମନ୍ତ୍ରଣାଳୟର ବରିଷ୍ଠ ଅଧିକାରୀଙ୍କ ସହିତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ପ୍ରତିନିଧି ଏବଂ ଅଙ୍ଗନବାଡି କର୍ମୀମାନେ ମଧ୍ୟ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ଅଙ୍ଗନବାଡ଼ି ଠାରୁ ଆରମ୍ଭ କରି ବିଦ୍ୟାଳୟ ପର୍ଯ୍ୟନ୍ତ ଗୋଟିଏ କ୍ୟାମ୍ପସ, ଗୋଟିଏ ପରିକଳ୍ପନା। ବିକଶିତ ଭାରତରେ ମାନବ ପୁଞ୍ଜିର ଏକ ସୁଦୃଢ଼ ମୂଳଦୁଆ ନିର୍ମାଣ କରିବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପରିକଳ୍ପନାକୁ ସାକାର କରିବା ଦିଗରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।
ଅଙ୍ଗନବାଡି କେନ୍ଦ୍ର ଏବଂ ବିଦ୍ୟାଳୟଗୁଡ଼ିକର ସମନ୍ୱିତ ମଡେଲ ମାଧ୍ୟମରେ ପ୍ରାରମ୍ଭିକ ଶୈଶବ ଯତ୍ନ ଏବଂ ଶିକ୍ଷା (ଇସିସିଇ)ର ଗୁରୁତ୍ୱ ଉପରେ ଆଲୋକପାତ କରାଯାଇଛି। ଏବେ ୨.୯ଲକ୍ଷ ଅଙ୍ଗନବାଡି ବିଭିନ୍ନ ବିଦ୍ୟାଳୟ ପରିସରରେ ଚାଲିଆସୁଛି। ଏବେ ଏହି ନିର୍ଦ୍ଦେଶାବଳୀ ପରିଚାଳନାଗତ ସ୍ପଷ୍ଟତା ପ୍ରଦାନ କରିବ ଏବଂ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ଏହି ମଡେଲକୁ ପ୍ରଭାବୀ ଢଙ୍ଗରେ ବୃଦ୍ଧି କରିବାରେ ସକ୍ଷମ କରିବ।
ମନ୍ତ୍ରୀ ଅନ୍ନପୂର୍ଣ୍ଣା ଦେବୀ – ବିଦ୍ୟାଳୟଗୁଡ଼ିକ ସହିତ ଅଙ୍ଗନୱାଡ଼ିଗୁଡ଼ିକର ପାଖାପାଖି ଅବସ୍ଥିତି ଶିଶୁର ଶିକ୍ଷଣ ଯାତ୍ରାର ମୂଳଦୁଆକୁ ସୁଦୃଢ଼ କରିଥାଏ। ଏହା ପ୍ରାରମ୍ଭିକ ଶୈଶବ ଯତ୍ନରୁ ଆନୁଷ୍ଠାନିକ ବିଦ୍ୟାଳୟକୁ ଏକ ସହଜ ପରିବର୍ତ୍ତନ ନିଶ୍ଚିତ କରିଥାଏ ଏବଂ ପିଲାମାନଙ୍କର ସାମଗ୍ରିକ ବିକାଶରେ ଯୋଗଦାନ କରିଥାଏ। ଏହି ନିର୍ଦ୍ଦେଶାବଳୀ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକ ପାଇଁ ଏକ ଗୁରୁତ୍ୱପୂର୍ଣ୍ଣ ରୋଡମ୍ୟାପ୍ ଭାବରେ କାର୍ଯ୍ୟ କରିବ ଯାହା ଏହି ସମନ୍ୱିତ ମଡେଲକୁ ବୃଦ୍ଧି କରିବ ଏବଂ ଏକ ସୁସ୍ଥ, ଶିକ୍ଷିତ ଏବଂ ସଶକ୍ତ ଯୁବ ପିଢ଼ି ପାଇଁ ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣକୁ ପୂରଣ କରିବ। ଶିକ୍ଷା ମନ୍ତ୍ରୀ ଶ୍ରୀ ପ୍ରଧାନ ତାଙ୍କ ଅଭିଭାଷଣରେ କହିଥିଲେ ଯେ, ପ୍ରାରମ୍ଭିକ ଶୈଶବ ଶିକ୍ଷା ଜୀବନବ୍ୟାପୀ ଶିକ୍ଷଣର ଆଧାର। ଅଙ୍ଗନବାଡ଼ିଗୁଡ଼ିକୁ ବିଦ୍ୟାଳୟଗୁଡ଼ିକ ସହିତ ସମନ୍ୱିତ କରି ଆମେ ଆରମ୍ଭରୁ ହିଁ ଏକ ନିରବଚ୍ଛିନ୍ନ ଏବଂ ସକ୍ଷମ ଶିକ୍ଷଣ ପରିବେଶ ସୃଷ୍ଟି କରୁଛୁ।
