ପ୍ରଧାନ ମହାଲେଖାକାର କାର୍ଯ୍ୟାଳୟ ଅଡିଟ-1 ସମ୍ମିଳନୀ କକ୍ଷଠାରେ
ଆଜି ଓଡିଶା ରାଜ୍ୟ ଅଡିଟ୍ ପରାମର୍ଶଦାତା ବୋର୍ଡ (SAAB) ବୈଠକ ଆଜି ଭୁବନେଶ୍ୱରରେ ଓଡ଼ିଶାର ପ୍ରଧାନ କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଅଛି । ପ୍ରଧାନ ମହାଲେଖାକାର ଅଡିଟ-1 ସୁବୁ. ଆର ଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ସାର୍ବଜନୀନ ଆର୍ଥିକ ପରିଚାଳନାରେ ସ୍ୱଚ୍ଛତା, ଉତ୍ତରଦାୟିତ୍ୱ ଏବଂ ଦକ୍ଷତା ବୃଦ୍ଧି ଓ ନିରେପେକ୍ଷ ଅଡିଟ ପାଇଁ ରାଜ୍ୟର ବିଭିନ୍ନ କ୍ଷେତ୍ରରେ ପାରଦର୍ଶିତା ଲାଭ କରିଥିବା ପ୍ରତିଷ୍ଠିତ ବ୍ୟକ୍ତି ମାନଙ୍କର ମତାମତ ଓ ସୁପରାମର୍ଶ ଦେବା ଲାଗି ଏହା ଆୟୋଜନ କରାଯାଇଥିଲା |
ଏହି ବୈଠକରେ ପ୍ରଫେସର ଡି. ଭେଙ୍କଟ ରମଣା, ଜାଭିୟର ଇନଷ୍ଟିଚୁଟ ଅଫ ମ୍ୟାନେଜମେଣ୍ଟ, ଡଃ ସୌମେନ୍ଦ୍ର ମୋହନ ପଟ୍ଟନାୟକ, ପୂର୍ବତନ କୁଳପତି ଉତ୍କଳ ବିଶ୍ୱବିଦ୍ୟାଳୟ , ଡଃ ପ୍ରଭାସ ରଞ୍ଜନ ମିଶ୍ର , ବିଶିଷ୍ଟ ଅର୍ଥନୀତିଜ୍ଞ ଓ ସ୍ତମ୍ଭକାର , ଶ୍ରୀ ବିଶ୍ୱଜିତ ମହାନ୍ତି, ବିଶିଷ୍ଟ ପରିବେଶବିତ ତଥା ଅଧକ୍ଷ ଗ୍ରୀନପିସ ଇଣ୍ଡିଆ , ଶ୍ରୀମତୀ ସୁଜାତା ମହାପାତ୍ର, ବିଶିଷ୍ଟ ଓଡିଶୀ ନୃତ୍ୟାଙ୍ଗନା , ଶ୍ରୀମତୀ ହିରଣ୍ମୟୀ ମିଶ୍ର , ବିଶିଷ୍ଟ ଲେଖିକା, ପ୍ରଫେସର ରଞ୍ଜନ କୁମାର ବଳ, କୁଳପତି ଏଏସବିଏମ ବିଶ୍ୱବିଦ୍ୟାଳୟ, ଶ୍ରୀ ଅକ୍ଷୟ କୁମାର ପାଢ଼ୀ, ନିର୍ଦ୍ଦେଶକ ସମ୍ବନ୍ଧ ଫିନସର୍ଭ ପ୍ରା. ଲି. ଓ ଶ୍ରୀ କମଳାକାନ୍ତ ରଥ , ବିଶିଷ୍ଟ ବ୍ୟଙ୍ଗଚିତ୍ରକାରୀ ସମ୍ମାନିତ ସଦସ୍ୟ ଭାବେ ଯୋଗ ଦେଇଥିଲେ । ଶ୍ରୀ ଅତୁଲ ପ୍ରକାଶ, ମହାଲେଖାକାର (ଲେଖା ପରୀକ୍ଷା -୨) ଏହି ବୈଠକରେ ଯୋଗଦାନ କରି ନିଜର ସୁଚିନ୍ତିତ ମତାମତ ପ୍ରଦାନ କରିଥିଲେ । ଲେଖାପରୀକ୍ଷା -୧ ଓ ଲେଖାପରୀକ୍ଷା -୨ କାର୍ଯ୍ୟାଳୟର ଉପ ମହାଲେଖାକାର ବୃନ୍ଦ ଓ ବରିଷ୍ଠ ଅଧିକାରୀମାନେ ବୈଠକରେ ଅଂଶଗ୍ରହଣ କରିଥିଲେ। ପ୍ରାରମ୍ଭରେ ସମ୍ମାନିତ ସଦସ୍ୟ ମାନଙ୍କୁ ଅଡିଟ୍ ର କାର୍ଯ୍ୟକଳାପ ବିଷୟରେ ସମ୍ୟକ ସୂଚନା ଦିଆଯାଇଥିଲା ।
ବୋର୍ଡର ସଦସ୍ୟମାନେ ଅଡିଟ୍ ଢାଞ୍ଚାକୁ ଆହୁରି ସୁଦୃଢ଼ କରିବା ଏବଂ ଆର୍ଥିକ ଶୃଙ୍ଖଳା ଏବଂ ସେବା ପ୍ରଦାନରେ ଉନ୍ନତି ପାଇଁ ସହଯୋଗୀ ପ୍ରୟାସକୁ ପ୍ରୋତ୍ସାହିତ କରିବା ପାଇଁ ମୂଲ୍ୟବାନ ଅନ୍ତର୍ଦୃଷ୍ଟି ଏବଂ ପରାମର୍ଶ ପ୍ରଦାନ କରିଥିଲେ। ବିଦ୍ୟୁତ୍ ଏବଂ ଖଣି କ୍ଷେତ୍ରର ଅଡିଟ୍ ଏବଂ ନିୟାମକ ସମ୍ପତ୍ତିର ନୂତନ ଧାରଣା, ବ୍ୟବସାୟ କରିବାର ସହଜତାକୁ ଉନ୍ନତ କରିବା ଏବଂ ରାଜ୍ୟ ପ୍ରୋଫାଇଲରେ ନିର୍ଗମନ ମାନଦଣ୍ଡ ଅନ୍ତର୍ଭୁକ୍ତ କରିବା ଉପରେ ମଧ୍ୟ ଚିନ୍ତନଶୀଳ ମୂଲ୍ୟବାନ ପରାମର୍ଶ ଦେଇଥିଲେ । ଅଡିଟ ରିପୋର୍ଟରେ ସରକାରଙ୍କ କେବଳ ତ୍ରୁଟିକୁ ସ୍ଥାନ ନ ଦେଇ ଉପଲବ୍ଧି ଗୁଡ଼ିକୁ ମଧ୍ୟ ଉଲ୍ଲେଖ କରିବା ପାଇଁ ପରାମର୍ଶ ଦେଇଥିଲେ । ଲିଙ୍ଗଗତ ବଜେଟ୍, ଜଳବାୟୁ ବଜେଟ୍ ତଥା କୃଷି କ୍ଷେତ୍ରରେ ସ୍ୱାବଲମ୍ବନ ହାସଲ କରିବା ଦିଗରେ ରାଜ୍ୟର ଅଗ୍ରଗତି ଉପରେ ଅଡିଟର ମୂଲ୍ୟାଙ୍କନକୁ ମଜବୁତ କରିବା ଉପରେ ମଧ୍ୟ ଆଲୋଚନ ହୋଇଥିଲା ।
ତାଙ୍କ ସମାପନା ଭାଷଣରେ, ଓଡ଼ିଶାର ପ୍ରଧାନ ମହା ଲେଖାକାର (ଲେଖାପରୀକ୍ଷା -୧ ) ସମସ୍ତ ସଦସ୍ୟଙ୍କ ସକ୍ରିୟ ଅଂଶଗ୍ରହଣ ଏବଂ ଗଠନମୂଳକ ମତାମତକୁ ପ୍ରଶଂସା କରିଥିଲେ ଏବଂ ରାଜ୍ୟରେ ସୁଶାସନରେ ଯୋଗଦାନ ଏବଂ ଅଡିଟ୍ ପ୍ରଭାବଶାଳୀତା ବୃଦ୍ଧି କରିବା ପାଇଁ ବିଭାଗର ପ୍ରତିବଦ୍ଧତାକୁ ପୁନଃଦୋହରାଇଥିଲେ ।
