କ୍ରିକେଟ୍ ପ୍ରେମୀଙ୍କ ପାଇଁ ଖୁସି ଖବର। ଆଜିଠାରୁ ଆରମ୍ଭ ହେଉଛି ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ଶୃଙ୍ଖଳା। ଆଜି ପ୍ରଥମ ମୁକାବିଲା ବଦୋଦରାରେ ଖେଳାଯିବ।
ଭାରତୀୟ ଦଳର ନେତୃତ୍ୱ ନେଉଛନ୍ତି ଯୁବ ତାରକା ଶୁଭମନ ଗିଲ୍। ଏହି ସିରିଜ୍ ପାଇଁ ବରିଷ୍ଠ ଖେଳାଳି ରୋହିତ ଶର୍ମା ଏବଂ ବିରାଟ କୋହଲି ଦଳକୁ ଫେରିଛନ୍ତି, ଯାହା ଫ୍ୟାନ୍ସଙ୍କ ମଧ୍ୟରେ ଅଧିକ ଉତ୍ସାହ ଭରିଦେଇଛି। ଅନ୍ୟପକ୍ଷରେ, ମାଇକେଲ ବ୍ରେସୱେଲଙ୍କ ନେତୃତ୍ୱରେ ପଡ଼ିଆକୁ ଓହ୍ଲାଇବ ନ୍ୟୁଜିଲାଣ୍ଡ ଦଳ।
ମ୍ୟାଚ୍ଟି ବଦୋଦରାର କୋଟାମ୍ବି ଷ୍ଟାଡିୟମ (Kotambi Stadium) ରେ ଖେଳାଯିବ। ଭାରତୀୟ ସମୟ ଅନୁସାରେ ଦିନ ୧ଟା ୩୦ ମିନିଟରେ ମ୍ୟାଚ୍ ଆରମ୍ଭ ହେବ।
ଫେବୃଆରୀ ୭ରୁ ଭାରତ-ଶ୍ରୀଲଙ୍କାରେ ଟ୍ବେଣ୍ଟି୨୦ ବିଶ୍ବକପ୍ ଆରମ୍ଭ ହେଉଛି। ଏହି ଶୃଙ୍ଖଳାରେ ଉଭୟ ଦଳର ଶ୍ରେଷ୍ଠ ଖେଳାଳି ଓହ୍ଲାଇବେ।
ଭାରତରେ ଦିନିକିଆ ଶୃଙ୍ଖଳା ଜିତିନାହିଁ ନ୍ୟୁଜିଲାଣ୍ଡ। ଦିନିକିଆ ଶୃଙ୍ଖଳାକୁ ନ୍ୟୁଜିଲାଣ୍ଡ ଗୁରୁତ୍ବ ଦେବା ପରି ଲାଗୁନାହିଁ। ଏହାର ୧୫-ଜଣିଆ ଦଳର ଆଠ ଜଣ ଭାରତରେ ଖେଳିନାହାନ୍ତି। ଦୁଇ ଜଣ ଆନ୍ତର୍ଜାତିକ ପଦାର୍ପଣ କରିନାହାନ୍ତି। ତେବେ ନିକଟ ଅତୀତରେ ନ୍ୟୁଜିଲାଣ୍ଡର ଦିନିକିଆ ରେକର୍ଡ ଭଲ। ୨୦୨୫ରେ ନ୍ୟୁଜିଲାଣ୍ଡ ୧୭ଟି ଦିନିକିଆ ଖେଳି ମାତ୍ର ୩ଟି ହାରିଛି। ପୁଣି ଏହା କ୍ରମାଗତ ୯ଟି ଦିନିକିଆ ଜିତିଛି। ଭାରତର ବ୍ୟାଟିଂ ଲାଇନ୍ ବେଶ୍ ଶକ୍ତିଶାଳୀ ଅଛି। ଶୁଭମନ ଗିଲ୍ ଓପନ୍ କରିବାକୁ ଥିବା ବେଳେ ଦୁଇ ଅଭିଜ୍ଞ ତାରକା ରୋହିତ ଶର୍ମା ଓ ବିରାଟ କୋହଲି ଭଲ ଫର୍ମରେ ଅଛନ୍ତି। ଦୀର୍ଘ ଦିନ ପରେ ଫେରିଥିବା ଶ୍ରେୟସ ଆୟର ଦଳର ଉପଅଧିନାୟକ ହୋଇଛନ୍ତି। ସୁସ୍ଥହେବା ପରେ ଫେରିଥିବା ଶୁଭମନ ଗିଲ୍ ଓ ଶ୍ରେୟସ ଆୟରଙ୍କ ଉପରେ ନଜର ରହିବ।
