ଆଜି ‘ବିଶ୍ୱ ଜଳ ଦିବସ’। ଜଳ ବିନା ଜୀବନ ଅସମ୍ଭବ, ଆଉ ଏହି ମହତ ବାର୍ତ୍ତାକୁ ନେଇ ସାରା ବିଶ୍ୱରେ ସଚେତନତା ସୃଷ୍ଟି କରାଯାଉଛି। ଏହି ଅବସରରେ ଦେଶବାସୀଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜଳ ସଂରକ୍ଷଣ ପାଇଁ ଏକ ଶକ୍ତିଶାଳୀ ଆହ୍ୱାନ ଦେଇଛନ୍ତି। ପ୍ରଧାନମନ୍ତ୍ରୀ କହିଛନ୍ତି ଯେ, ଆସନ୍ତୁ ଆମେ ସମସ୍ତେ ମିଶି ଜଳର ପ୍ରତ୍ୟେକ ବୁନ୍ଦା ସଂରକ୍ଷଣ କରିବା ପାଇଁ ନିଜର ପ୍ରତିବଦ୍ଧତାକୁ ପୁନଃ ଦୃଢ଼ କରିବା।
: ପ୍ରଧାନମନ୍ତ୍ରୀ ମୋଦୀ ଜଳ ସଂରକ୍ଷଣ ଦିଗରେ କାର୍ଯ୍ୟ କରୁଥିବା ବ୍ୟକ୍ତି ଓ ସଂଗଠନମାନଙ୍କୁ ପ୍ରଶଂସା କରିଛନ୍ତି। ସେ କହିଛନ୍ତି ଯେ, ଆଜି ସେହି ଲୋକମାନଙ୍କୁ ସମ୍ମାନ ଜଣାଇବାର ଦିନ, ଯେଉଁମାନେ ସ୍ଥାୟୀ ଜଳ ପରିଚାଳନା ଅଭ୍ୟାସରେ ନିୟୋଜିତ ଅଛନ୍ତି ଏବଂ ସମାଜରେ ଜଳ ସଂରକ୍ଷଣ ସଂସ୍କୃତିକୁ ପ୍ରୋତ୍ସାହିତ କରୁଛନ୍ତି। ଜଳ ସଂରକ୍ଷଣ କେବଳ ଏକ କର୍ତ୍ତବ୍ୟ ନୁହେଁ, ବରଂ ଏହା ଆମର ଭବିଷ୍ୟତ ପିଢ଼ି ପାଇଁ ଏକ ବଡ଼ ଉପହାର ବୋଲି ସେ ମତ ପ୍ରକାଶ କରିଛନ୍ତି।
ବଢ଼ୁଥିବା ଜଳ ସଙ୍କଟକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ସଚେତନତା ଉପରେ ଗୁରୁତ୍ୱ ଦେଇଛନ୍ତି। ପାରମ୍ପରିକ ଜଳ ସଂରକ୍ଷଣ ପଦ୍ଧତି ସହ ଆଧୁନିକ ଜ୍ଞାନକୌଶଳର ବ୍ୟବହାର କରି କିଭଳି ବର୍ଷା ଜଳ ଅମଳ ଓ ଭୂତଳ ଜଳସ୍ତର ବୃଦ୍ଧି କରାଯାଇପାରିବ, ସେ ନେଇ ସରକାରୀ ସ୍ତରରେ ବିଭିନ୍ନ ଯୋଜନା ଜାରି ରହିଛି। ପ୍ରତ୍ୟେକ ନାଗରିକ ଜଳର ଅପବ୍ୟବହାର ରୋକିବାକୁ ସେ ଅନୁରୋଧ କରିଛନ୍ତି।
