ସରକାରୀ ବାବୁଙ୍କ ମନମୁଖୀ କାର୍ଯ୍ୟକଳାପ ଉପରେ ଏବେ ଲାଗିବ ବ୍ରେକ୍। ରାଜ୍ୟ ସରକାରଙ୍କ ଅର୍ଥ ବିଭାଗ ପକ୍ଷରୁ ସବୁ ବିଭାଗକୁ ଏକ କଡ଼ା ଚିଠି ଲେଖାଯାଇଛି। ସରକାରୀ ନିୟମ ଅନୁସାରେ, ଯଦି କୌଣସି ଅଧିକାରୀଙ୍କ ବଦଳି ହୁଏ କିମ୍ବା ନୂଆ ନିଯୁକ୍ତି ମିଳେ, ତେବେ ସର୍ବାଧିକ ୪ ମାସ ବା ୧୨୦ ଦିନ ଭିତରେ ତାଙ୍କୁ ନୂଆ ଦାୟିତ୍ୱ ଆବଣ୍ଟନ କରିବା ଜରୁରୀ। ପୁରୁଣା ପଦବୀରୁ ଆଣି ନୂଆ ପଦବୀରେ ଅବସ୍ଥାପିତ କରିବା ପାଇଁ ସରକାର ଯଥେଷ୍ଟ ସମୟ ଦେଉଥିଲେ ମଧ୍ୟ ଅନେକ ସ୍ଥାନରେ ଏହାର ବ୍ୟତିକ୍ରମ ଦେଖିବାକୁ ମିଳୁଛି। ମାସ ମାସ ଧରି ଅଧିକାରୀମାନେ ବିନା କୌଣସି ଦାୟିତ୍ୱରେ ବସି ରହୁଛନ୍ତି ଏବଂ ବିନା କାମରେ ସେମାନଙ୍କୁ ସରକାରୀ ତହବିଲ୍ରୁ ମୋଟା ଅଙ୍କର ଦରମା ଦେବାକୁ ପଡ଼ୁଛି।
ଏହି ସମ୍ବେଦନଶୀଳ ପ୍ରସଙ୍ଗକୁ ନେଇ ଅର୍ଥ ବିଭାଗର ପ୍ରମୁଖ ସଚିବ ସଞ୍ଜୀବ କୁମାର ମିଶ୍ର ଶୁକ୍ରବାର ଦିନ ସମସ୍ତ ବିଭାଗର ଅତିରିକ୍ତ ମୁଖ୍ୟ ସଚିବ, ପ୍ରମୁଖ ସଚିବ ଏବଂ ଶାସନ ସଚିବମାନଙ୍କୁ ପତ୍ର ଲେଖି ସାବଧାନ କରିଦେଇଛନ୍ତି। ଚିଠିରେ ସ୍ପଷ୍ଟ ଭାବେ କୁହାଯାଇଛି ଯେ, ବିଭିନ୍ନ ସ୍ତରରେ ଦାୟିତ୍ୱରେ ଥିବା ଅଧିକାରୀମାନେ ଅନଧିକୃତ ଭାବେ ନିଯୁକ୍ତି ଫାଇଲ୍କୁ ପକାଇ ରଖୁଛନ୍ତି। ଯଦି କୌଣସି ବିଶେଷ ପରିସ୍ଥିତି ଯୋଗୁଁ ୧୨୦ ଦିନ ଭିତରେ ପଦବୀ ଆବଣ୍ଟନ ହୋଇପାରୁ ନାହିଁ, ତେବେ ସେ ବିଷୟରେ ଅର୍ଥ ବିଭାଗକୁ ଜଣାଇବା କଥା, କିନ୍ତୁ କେହି ବି ସେଭଳି କରୁନାହାନ୍ତି। ଏହାଦ୍ୱାରା କେବଳ ସରକାରୀ କାର୍ଯ୍ୟ ବାଧାପ୍ରାପ୍ତ ହେଉନାହିଁ, ବରଂ ରାଜକୋଷ ଉପରେ ଅଯଥା ଆର୍ଥିକ ବୋଝ ପଡ଼ୁଛି I
