ପରିବାରଠାରୁ ବିଚ୍ଛିନ୍ନ ହୋଇଯାଇଥିବା ନିଖୋଜ ମହିଳା ଓ ଶିଶୁମାନଙ୍କୁ ସୁରକ୍ଷିତ ଭାବେ ଉଦ୍ଧାର କରି ପୁନଃ ପରିବାର ସହ ମିଳନ କରାଇବାରେ ଓଡ଼ିଶା ପୁଲିସ ଅଭୂତପୂର୍ବ ସଫଳତା ହାସଲ କରିଛି। ରାଜ୍ୟ ଆରକ୍ଷୀ ମହାନିର୍ଦ୍ଦେଶକ (DGP) ଯୋଗେଶ ବାହାଦୁର ଖୁରାନିଆଙ୍କ ପ୍ରତ୍ୟକ୍ଷ ଦିଗଦର୍ଶନ ଏବଂ ମହିଳା ଓ ଶିଶୁ ଅପରାଧ ନିରାକରଣ ଶାଖା (CAW & CW)ର ତଦନ୍ତ ଓ ଆନ୍ତଃରାଜ୍ୟ ସମନ୍ୱୟ ଯୋଗୁଁ ଏହି ଗୁରୁତ୍ୱପୂର୍ଣ୍ଣ ସଫଳତା ମିଳିପାରିଛି।
ଜାନୁଆରିରୁ ଜୁନ୍ ୨୦୨୬ ମଧ୍ୟରେ ରାଜ୍ୟରେ ନିଖୋଜ ତଥା ଉଦ୍ଧାର ତଥ୍ୟ:
-
ଶିଶୁ ଉଦ୍ଧାର: ରାଜ୍ୟରେ ୪,୮୭୩ ଜଣ ଶିଶୁ (୫୩୮ ନାବାଳକ, ୪,୩୩୪ ନାବାଳିକା ଓ ୧ ଜଣ ଟ୍ରାନ୍ସଜେଣ୍ଡର) ନିଖୋଜ ନେଇ ରିପୋର୍ଟ ହୋଇଥିଲା। ଓଡ଼ିଶା ପୁଲିସ ତତ୍ପରତା ପ୍ରକାଶ କରି ପୂର୍ବ ନିଖୋଜ ମାମଲା ସହ ମୋଟ ୫,୪୧୩ ଜଣ ଶିଶୁଙ୍କୁ ସୁରକ୍ଷିତ ଭାବେ ଉଦ୍ଧାର କରିଛି।
-
ମହିଳା ଉଦ୍ଧାର: ସେହିପରି ୧୦,୬୦୫ ଜଣ ମହିଳା ନିଖୋଜ ହୋଇଥିବା ବେଳେ ପୁଲିସ ଦକ୍ଷତାର ସହ ମୋଟ ୧୨,୧୭୭ ଜଣ ମହିଳାଙ୍କୁ ଉଦ୍ଧାର କରିବାକୁ ସମର୍ଥ ହୋଇଛି।
ନିଖୋଜ ମହିଳା ଓ ଶିଶୁଙ୍କୁ ଖୋଜି ବାହାର କରିବାରେ ପୁରୀ ଜିଲ୍ଲା ରାଜ୍ୟରେ ସର୍ବଶ୍ରେଷ୍ଠ ପ୍ରଦର୍ଶନ କରିଛି।
| କ୍ଷେତ୍ର | ସର୍ବଶ୍ରେଷ୍ଠ ପ୍ରଦର୍ଶନକାରୀ ଜିଲ୍ଲା / ଅଞ୍ଚଳ |
| ଶିଶୁ ଉଦ୍ଧାର | ପୁରୀ (୧୧୬୧), UPD ଭୁବନେଶ୍ୱର (୩୯୯), ମୟୂରଭଞ୍ଜ (୨୭୮) |
| ମହିଳା ଉଦ୍ଧାର | ପୁରୀ (୩୭୧୩), ଯାଜପୁର (୮୨୦), ଗଞ୍ଜାମ (୫୮୧) |
ମୋଟ ୧,୧୬୧ ଜଣ ଶିଶୁ ଏବଂ ୩,୭୧୩ ଜଣ ମହିଳାଙ୍କୁ ଉଦ୍ଧାର କରି ପୁରୀ ଜିଲ୍ଲା ପୁଲିସ ରାଜ୍ୟରେ ସୀର୍ଷ ସ୍ଥାନ ବଜାୟ ରଖିଛି।
ନିଖୋଜ ମହିଳା ଓ ଶିଶୁଙ୍କୁ ସୁରକ୍ଷିତ ଫେରାଇ ଆଣିବା ପାଇଁ ମହିଳା ଓ ଶିଶୁ ସୁରକ୍ଷା ଶାଖା ପକ୍ଷରୁ ନିୟମିତ ଭାବେ “ଅପରେସନ୍ ଅନ୍ୱେଷଣ” ଅଭିଯାନ ଚଲାଯାଉଛି।
-
ଚଳିତ ବର୍ଷ ଏପର୍ଯ୍ୟନ୍ତ ୨ଟି ସ୍ୱତନ୍ତ୍ର ଅଭିଯାନ କରାଯାଇଛି।
-
ଗତ ୧୮ ଜୁଲାଇ ୨୦୨୬ ରୁ ୨୨ ଜୁଲାଇ ୨୦୨୬ ମଧ୍ୟରେ ଅନୁଷ୍ଠିତ ଅଭିଯାନରେ ୩୨୧ ଜଣ ଶିଶୁ (୩୫ ନାବାଳକ, ୨୮૬ ନାବାଳିକା) ଏବଂ ୨,୪୩୪ ଜଣ ନିଖୋଜ ମହିଳାଙ୍କୁ ଉଦ୍ଧାର କରାଯାଇଛି।
ଆଗାମୀ ଦିନରେ ମହିଳା ଓ ଶିଶୁଙ୍କ ସୁରକ୍ଷାକୁ ସର୍ବାଧିକ ପ୍ରାଥମିକତା ଦେଇ ଏହିପରି ଅଭିଯାନକୁ ଆହୁରି ବ୍ୟାପକ ଓ ଜୋରଦାର କରାଯିବ ବୋଲି ପୁଲିସ ପ୍ରଶାସନ ପକ୍ଷରୁ ସୂଚନା ଦିଆଯାଇଛି।
