ରାଜନଗର (ସିଧା ସମ୍ବାଦ): ବିଶ୍ୱ ଶ୍ରମିକ ଦିବସ ଅବସରରେ ରାଜନଗର ଶୈଳେନ୍ଦ୍ର ମହାବିଦ୍ୟାଳୟ ପରିସରରେ ଏକ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଅବସରରେ ରାଜନଗର ବ୍ଲକର ସମସ୍ତ ଖବରକାଗଜ ବିତରକମାନଙ୍କୁ ସମ୍ବର୍ଦ୍ଧନା କରାଯାଇଛି।
ଏହି କାର୍ଯ୍ୟକ୍ରମରେ ରାଜନଗର ବନଖଣ୍ଡ ଅଧିକାରୀ ଭରଦରାଜ ଗାଓଁକର ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ସେ କହିଥିଲେ ଯେ, “ଶ୍ରମିକମାନଙ୍କ ନିଷ୍ଠାପର ପରିଶ୍ରମ ଯୋଗୁଁ ଆଜି ବିଶ୍ୱର ଉନ୍ନତି ସମ୍ଭବ ହୋଇପାରିଛି।” ସମାଜ ଗଠନରେ ଶ୍ରମିକଙ୍କ ଅବଦାନ ଅତୁଳନୀୟ ବୋଲି ସେ ମତବ୍ୟକ୍ତ କରିଥିଲେ।
‘ସୁଶାସନ’ର ସମ୍ପାଦକ ଭାସ୍କର ରାଉତରାୟଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମକୁ ‘ରାଜଭୂମି’ର ସମ୍ପାଦକ ପବିତ୍ର ବ୍ରହ୍ମପୁତ୍ର ନାୟକ ସଂଯୋଜନା କରିଥିଲେ। ସମ୍ମାନିତ ଅତିଥି ଭାବେ:
-
ଏବିଇଓ ବିଜୟ କୁମାର ଜେନା
-
ପ୍ରଫେସର ସତ୍ୟବାଦୀ ଜେନା
-
ଅଧ୍ୟାପକ ଭଗବତୀ ରାଉତ
-
ମେଜର ଗଗନ ବିହାରୀ ସ୍ୱାଇଁ
-
ଡାକ୍ତର ଘନଶ୍ୟାମ ମିଶ୍ର
-
ରବି ନାରାୟଣ ଲେଙ୍କା
ଯୋଗ ଦେଇ ଶ୍ରମିକ ଦିବସର ତାତ୍ପର୍ଯ୍ୟ ଓ ମହତ୍ୱ ଉପରେ ଆଲୋକପାତ କରିଥିଲେ।
ଏହି ଅବସରରେ ବ୍ଲକର ୧୦ ଜଣ ଖବରକାଗଜ ବିତରକଙ୍କୁ ଉତ୍ତରୀୟ ଓ ମାନପତ୍ର ପ୍ରଦାନ କରାଯାଇ ସମ୍ବର୍ଦ୍ଧିତ କରାଯାଇଥିଲା। ଖରା, ବର୍ଷା ଓ ଶୀତକୁ ଖାତିର ନକରି ଲୋକଙ୍କ ପାଖରେ ଖବର ପହଞ୍ଚାଉଥିବା ଏହି ଶ୍ରମିକମାନଙ୍କ କାର୍ଯ୍ୟକୁ ସମସ୍ତେ ପ୍ରଶଂସା କରିଥିଲେ।
ସାମ୍ବାଦିକ ଜଗନ୍ନାଥ ଦାସ ଧନ୍ୟବାଦ ଅର୍ପଣ କରିଥିବା ବେଳେ ଅଧ୍ୟାପିକା ତନୁଶ୍ରୀ ମିଶ୍ର ଓ ସାମ୍ବାଦିକ ପିଣ୍ଟୁ ମହାରଣା କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ଏହି କାର୍ଯ୍ୟକ୍ରମରେ ସ୍ଥାନୀୟ ଅଞ୍ଚଳର ବହୁ ବୁଦ୍ଧିଜୀବୀ ଓ ସମାଜସେବୀ ଉପସ୍ଥିତ ଥିଲେ।
