ନୀତୀଶ କୁମାରଙ୍କୁ ନେଇ ଦେଶର ରାଜନୀତି ଏବେ ସରଗରମ। ବିହାରର ପୂର୍ବତନ ମୁଖ୍ୟମନ୍ତ୍ରୀ ତଥା ଜେଡିୟୁର ଶୀର୍ଷ ନେତା ନୀତୀଶ କୁମାରଙ୍କୁ ଦେଶର ଉପ-ପ୍ରଧାନମନ୍ତ୍ରୀ କରିବା ପାଇଁ ଏବେ ଜୋରଦାର ଦାବି ଉଠିଛି। ଆଶ୍ଚର୍ଯ୍ୟର କଥା ହେଉଛି, କେବଳ ନୀତୀଶଙ୍କ ନିଜ ଦଳ ଜେଡିୟୁ ନୁହେଁ, ବରଂ ବିରୋଧୀ ଆରଜେଡି ମଧ୍ୟ ଏହି ଦାବିକୁ ସମର୍ଥନ କରିବା ପରେ ରାଜନୈତିକ ହଲଚଲ ତେଜିବାରେ ଲାଗିଛି।
ମୋଦୀ ମନ୍ତ୍ରିମଣ୍ଡଳର ସମ୍ପ୍ରସାରଣ ନେଇ ଚର୍ଚ୍ଚା ଚାଲିଥିବା ବେଳେ ଜେଡିୟୁ ବିଧାୟକ ପଙ୍କଜ ମିଶ୍ର ଏକ ବଡ଼ ବୟାନ ଦେଇଛନ୍ତି। ଜାତୀୟ ଗଣମାଧ୍ୟମକୁ ସୂଚନା ଦେଇ ସେ କହିଛନ୍ତି ଯେ, ନୀତୀଶ କୁମାରଙ୍କୁ ଉପ-ପ୍ରଧାନମନ୍ତ୍ରୀ କରାଯିବା ଉଚିତ ଏବଂ ବିହାରର ଜନସାଧାରଣ ମଧ୍ୟ ଏହାହିଁ ଚାହୁଁଛନ୍ତି। ପ୍ରାୟ ୨୦ ବର୍ଷ ଧରି ବିହାରର ମୁଖ୍ୟମନ୍ତ୍ରୀ ରହିବା ସହ ପୂର୍ବରୁ କେନ୍ଦ୍ରରେ ମନ୍ତ୍ରୀ ଭାବେ କାର୍ଯ୍ୟ କରିଥିବା ନୀତୀଶଙ୍କ ନିକଟରେ ବିପୁଳ ଅଭିଜ୍ଞତା ରହିଛି। ତେଣୁ କେନ୍ଦ୍ର ସରକାର ଏହି ଅଭିଜ୍ଞତାର ଲାଭ ଉଠାଇବା ଆବଶ୍ୟକ ଏବଂ ତାଙ୍କୁ ଉପ-ପ୍ରଧାନମନ୍ତ୍ରୀ ପଦ ମିଳିଲେ ତାହା ହିଁ ତାଙ୍କ ପାଇଁ ପ୍ରକୃତ ସମ୍ମାନ ହେବ।
ସୂଚନାଥାଉ କି, କିଛି ଦିନ ପୂର୍ବରୁ ଆରଜେଡିର ବରିଷ୍ଠ ନେତା ମୁକେଶ ରୋଶନ ମଧ୍ୟ ସମାନ ଦାବି କରିଥିଲେ। ସେ କହିଥିଲେ ଯେ ନୀତୀଶ କୁମାରଙ୍କୁ କୃଷି ଓ ରେଳବାଇ ଭଳି ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟ ମିଳିବା ସହ ଉପ-ପ୍ରଧାନମନ୍ତ୍ରୀ କରାଯାଉ, ଯାହା ସମଗ୍ର ବିହାର ପାଇଁ ଗର୍ବର ବିଷୟ ହେବ। ଏପ୍ରିଲ ମାସରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇ ବର୍ତ୍ତମାନ ରାଜ୍ୟସଭା ସଦସ୍ୟ ଥିବା ନୀତୀଶଙ୍କୁ ନେଇ ଚାଲିଥିବା ଏହି ଚର୍ଚ୍ଚା ଉପରେ ବିଜେପି ନେତା ତଥା ବିହାର ଶିକ୍ଷାମନ୍ତ୍ରୀ ମିଥିଳେଶ ତିୱାରୀ ମଧ୍ୟ ପ୍ରତିକ୍ରିୟା ରଖି ନୀତୀଶଙ୍କ ଅଭିଜ୍ଞତାକୁ ସ୍ୱୀକାର କରିଛନ୍ତି।
ବର୍ତ୍ତମାନର ସମୀକରଣକୁ ଦେଖିଲେ ପ୍ରଶ୍ନ ଉଠୁଛି, ମୋଦୀ ସରକାରଙ୍କ କ୍ୟାବିନେଟ୍ ସମ୍ପ୍ରସାରଣରେ କଣ ନୀତୀଶ କୁମାରଙ୍କୁ ମିଳିବ ଉପ-ପ୍ରଧାନମନ୍ତ୍ରୀ ଆସନ? କେନ୍ଦ୍ର ସରକାର ଜେଡିୟୁ ଏବଂ ଆରଜେଡିର ଏହି ଦାବିକୁ ଗ୍ରହଣ କରିବେ ତ?
