ନୂଆଦିଲ୍ଲୀ: ରେଳ ଯାତ୍ରୀଙ୍କ ପାଇଁ ବଡ଼ ଖବର। ଭାରତୀୟ ରେଳବାଇର ଅନଲାଇନ୍ ଟିକେଟିଂ ପ୍ଲାଟଫର୍ମ IRCTC (Indian Railway Catering and Tourism Corporation) ଏକ ବଡ଼ ପରିବର୍ତ୍ତନ କରିବାକୁ ଯାଉଛି। ଦୀର୍ଘ ୨୨ ବର୍ଷ ପରେ ଆଇଆରସିଟିସି ନିଜର ଓ୍ବେବସାଇଟକୁ ସମ୍ପୂର୍ଣ୍ଣ ରୂପେ ବଦଳାଇ ଏକ ନୂଆ ବିଟା (Beta) ସଂସ୍କରଣ ଲଞ୍ଚ୍ କରିଛି। ଏହି ନୂଆ ପରିବର୍ତ୍ତନ ଫଳରେ ଯାତ୍ରୀମାନେ ପୂର୍ବ ଅପେକ୍ଷା ଅତି ସହଜରେ ଏବଂ ଦ୍ରୁତ ଗତିରେ ଟିକେଟ୍ ବୁକ୍ କରିପାରିବେ।
ଗୋଟିଏ ମିନିଟରେ ହେବ ୧.୫ ଲକ୍ଷ ଟିକେଟ୍ ବୁକିଂ: ନୂଆ ଓ୍ବେବସାଇଟର ସବୁଠାରୁ ବଡ଼ ବିଶେଷତ୍ୱ ହେଉଛି ଏହାର ସ୍ପିଡ୍ ବା କ୍ଷମତା। ବର୍ତ୍ତମାନର ସିଷ୍ଟମରେ ପ୍ରତି ମିନିଟରେ ପ୍ରାୟ ୨୫,୦୦୦ ଟିକେଟ୍ ବୁକ୍ ହେଉଥିବା ବେଳେ, ଏହି ନୂଆ ଆଧୁନିକ ବିଟା ଓ୍ବେବସାଇଟ୍ ଜରିଆରେ ପ୍ରତି ମିନିଟରେ ୧.୫ ଲକ୍ଷ (ଦେଢ଼ ଲକ୍ଷ) ଟିକେଟ୍ ବୁକ୍ କରାଯାଇପାରିବ। ଏହାଦ୍ୱାରା ବିଶେଷ କରି ତତ୍କାଳ ଟିକେଟ୍ ବୁକିଂ ସମୟରେ ଓ୍ବେବସାଇଟ୍ ସ୍ଲୋ ହେବା କିମ୍ବା ହ୍ୟାଙ୍ଗ୍ ହେବା ଭଳି ସମସ୍ୟାରୁ ଯାତ୍ରୀମାନଙ୍କୁ ସମ୍ପୂର୍ଣ୍ଣ ମୁକ୍ତି ମିଳିବ।
ନୂଆ ବିଟା ଓ୍ବେବସାଇଟର ମୁଖ୍ୟ ବୈଶିଷ୍ଟ୍ୟ:
-
ୟୁଜର-ଫ୍ରେଣ୍ଡଲି ଇଣ୍ଟରଫେସ୍: ସାଧାରଣ ଲୋକ ମଧ୍ୟ ଯେପରି ସହଜରେ ଟିକେଟ୍ କାଟିପାରିବେ, ସେଥିପାଇଁ ଏହାର ଡିଜାଇନକୁ ଅତି ସରଳ କରାଯାଇଛି।
-
ଆଡଭାନ୍ସଡ୍ ସର୍ଚ୍ଚ ଫିଲ୍ଟର: ଟ୍ରେନ, ସିଟ୍ ଏବଂ ଶ୍ରେଣୀ (Class) ଖୋଜିବା ପାଇଁ ଏଥିରେ ନୂଆ ଏବଂ ସ୍ମାର୍ଟ ଫିଲ୍ଟର ବ୍ୟବସ୍ଥା ଦିଆଯାଇଛି।
-
ୱାନ୍-କ୍ଲିକ୍ ପେମେଣ୍ଟ: ଟିକେଟ୍ ବୁକିଂ ପ୍ରକ୍ରିୟାକୁ ଦ୍ରୁତ କରିବା ପାଇଁ ପେମେଣ୍ଟ ଗେଟୱେକୁ ଅଧିକ ସୁରକ୍ଷିତ ଓ ଫାଷ୍ଟ କରାଯାଇଛି।
-
AI ଆଧାରିତ ପରାମର୍ଶ: ଯାତ୍ରୀଙ୍କ ପୂର୍ବ ଟ୍ରାଭେଲ୍ ହିଷ୍ଟ୍ରି ଆଧାରରେ ଓ୍ବେବସାଇଟ୍ ସ୍ୱତଃପ୍ରବୃତ୍ତ ଭାବେ ସର୍ଚ୍ଚ ଅପ୍ସନ ଦେଖାଇବ।
୨୨ ବର୍ଷ ପରେ ବଡ଼ ମେକଓଭର: ୨୦୦୨ ମସିହାରେ ଆଇଆରସିଟିସି ପ୍ରଥମ ସେବା ଆରମ୍ଭ କରିଥିଲା। ସେବେଠାରୁ ଏପର୍ଯ୍ୟନ୍ତ ଓ୍ବେବସାଇଟରେ ଛୋଟମୋଟ ପରିବର୍ତ୍ତନ ହୋଇଥିଲେ ମଧ୍ୟ ଏତେ ବଡ଼ ସେବା ଏବଂ କ୍ଷମତା ବିଶିଷ୍ଟ ଅପଗ୍ରେଡ୍ ପ୍ରଥମ ଥର ପାଇଁ କରାଯାଇଛି। ବର୍ତ୍ତମାନ ଏହା ବିଟା ଫେଜ୍ ବା ପରୀକ୍ଷାମୂଳକ ଭାବେ ଚାଲୁ ରହିଛି, ଯାହାକୁ ଖୁବଶୀଘ୍ର ସମସ୍ତ ୟୁଜରଙ୍କ ପାଇଁ ସମ୍ପୂର୍ଣ୍ଣ ରୂପେ ଲାଇଭ୍ କରାଯିବ।
ରେଳ ବିଭାଗର ଏହି ବଡ଼ ପଦକ୍ଷେପ ଯୋଗୁଁ ଘଣ୍ଟା ଘଣ୍ଟା ଧରି ଲାଇନରେ ଛିଡ଼ା ହେବା କିମ୍ବା ଇଣ୍ଟରନେଟ୍ ସ୍ଲୋ ଯୋଗୁଁ ଟିକେଟ୍ ପାଇବାରୁ ବଞ୍ଚିତ ହେଉଥିବା କୋଟି କୋଟି ଭାରତୀୟ ଯାତ୍ରୀ ବିଶେଷ ଭାବେ ଉପକୃତ ହେବେ।
