ଭୋଟର ତାଲିକାର ସ୍ବତନ୍ତ୍ର ସଘନ ସଂଶୋଧନକୁ ନେଇ ମୁଖ୍ୟ ନିର୍ବାଚନ ଆୟୁକ୍ତ (CEC) ଜ୍ଞାନେଶ କୁମାରଙ୍କ ବିରୋଧରେ ସାରା ଦେଶରେ ବିରୋଧୀ ଦଳଗୁଡ଼ିକ ବିକ୍ଷୋଭ ପ୍ରଦର୍ଶନ କରୁଛନ୍ତି। ତାଙ୍କ ଇସ୍ତଫା ଦାବି ଜୋର ଧରୁଥିବା ସମୟରେ, ମୁଖ୍ୟ ନିର୍ବାଚନ କମିସନର ଓ ଅନ୍ୟ ନିର୍ବାଚନ କମିସନରଙ୍କ ନିଯୁକ୍ତି ପ୍ରକ୍ରିୟାକୁ ନେଇ ସୁପ୍ରିମକୋର୍ଟ ଏକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନେଇଛନ୍ତି।
ନିଯୁକ୍ତି ସମ୍ବନ୍ଧିତ ପୂର୍ବ ନିଷ୍ପତ୍ତିର ପୁନଃ ଯାଞ୍ଚ କରିବାକୁ ସୁପ୍ରିମକୋର୍ଟ ସମ୍ମତି ପ୍ରକାଶ କରିଛନ୍ତି। ଗତ ସେପ୍ଟେମ୍ବର ୨୩ ତାରିଖରେ ଜଷ୍ଟିସ୍ ଦୀପଙ୍କର ଦତ୍ତ ଓ ଜଷ୍ଟିସ୍ ସତୀଶ ଚନ୍ଦ୍ର ଶର୍ମାଙ୍କ ପୀଠ ଏହି ମାମଲାକୁ ସାମ୍ବିଧାନିକ ବେଞ୍ଚକୁ ପଠାଇବା ପ୍ରସଙ୍ଗରେ ଭିନ୍ନ ମତ ଦେଇଥିଲେ। ଜଷ୍ଟିସ୍ ଦତ୍ତ ଏହାକୁ ସାମ୍ବିଧାନିକ ବେଞ୍ଚକୁ ପଠାଇବା ଆବଶ୍ୟକ ନାହିଁ ବୋଲି କହିଥିବା ବେଳେ, ଜଷ୍ଟିସ୍ ଶର୍ମା ଏହାକୁ ସାମ୍ବିଧାନିକ ବେଞ୍ଚକୁ ପଠାଇବା ପାଇଁ ରାୟ ଦେଇଥିଲେ।
ତେବେ ଏହି ନିଷ୍ପତ୍ତି ବିରୋଧରେ ଦାଖଲ ଆବେଦନରେ ଜଷ୍ଟିସ୍ ସତୀଶ ଚନ୍ଦ୍ର ଶର୍ମାଙ୍କ ରାୟରେ ପକ୍ଷପାତିତାର ଆଶଙ୍କା ପ୍ରକାଶ କରାଯାଇଛି। ଆବେଦନକାରୀଙ୍କ ଦର୍ଶାଇବା ଅନୁଯାୟୀ, ଜଷ୍ଟିସ୍ ଶର୍ମାଙ୍କ ପୁଅ ମଧ୍ୟପ୍ରଦେଶ ହାଇକୋର୍ଟରେ ଭାରତୀୟ ନିର୍ବାଚନ ଆୟୋଗ (ECI)ର ଷ୍ଟାଣ୍ଡିଂ କାଉନସିଲ୍ ଭାବେ କାର୍ଯ୍ୟ କରୁଛନ୍ତି, ଯାହା ଦ୍ୱାରା ନିଷ୍ପତ୍ତି ପ୍ରଭାବିତ ହୋଇଥାଇପାରେ। ବରିଷ୍ଠ ଆଇନଜୀବୀ ଗୋପାଳ ଶଙ୍କରନାରାୟଣନ ଏହି ସମ୍ବନ୍ଧରେ ସିଜେଆଇ ସୂର୍ଯ୍ୟ କାନ୍ତ, ଜଷ୍ଟିସ୍ ଜୟମାଲ୍ୟ ବାଗଚୀ ଓ ଜଷ୍ଟିସ୍ ଭି. ମୋହନାଙ୍କ ପୀଠରେ ଆବେଦନ କରିଛନ୍ତି।
୨୦୨୩ ମସିହାରେ କେନ୍ଦ୍ର ସରକାର ନିର୍ବାଚନ ଆୟୁକ୍ତମାନଙ୍କ ନିଯୁକ୍ତି ନିୟମରେ ପରିବର୍ତ୍ତନ କରି ନିଯୁକ୍ତି କମିଟିରୁ ଭାରତର ପ୍ରଧାନ ବିଚାରପତି (CJI)ଙ୍କୁ ବାଦ ଦେଇଥିଲେ। ବର୍ତ୍ତମାନର ୩ ଜଣିଆ ମନୋନୟନ କମିଟିରେ ପ୍ରଧାନମନ୍ତ୍ରୀ, ଲୋକସଭାର ବିରୋଧୀ ଦଳ ନେତା ଓ ଜଣେ କ୍ୟାବିନେଟ୍ ମନ୍ତ୍ରୀ ରହିଛନ୍ତି। ଏହା ଦ୍ବାରା କମିଟିରେ ସରକାରଙ୍କ ପାଖରେ ୨ ଜଣ ସଦସ୍ୟଙ୍କ ବହୁମତ ରହୁଥିବାରୁ, ନିଯୁକ୍ତି ପ୍ରକ୍ରିୟାରେ ବିରୋଧୀଙ୍କ ଭୂମିକା ନାମମାତ୍ର ହୋଇ ରହିଯାଇଥିବା ନେଇ ଅଭିଯୋଗ ହୋଇଛି।
