ରାଜଧାନୀବାସୀଙ୍କ ପାଇଁ ଏକ ବଡ଼ ଖବର। ବଦଳିବାକୁ ଯାଉଛି ପ୍ରସିଦ୍ଧ ୪ ନମ୍ବର ମାର୍କେଟ୍ର ଚେହେରା। ଏଣିକି ଗ୍ରାହକ ଏବଂ ବ୍ୟବସାୟୀଙ୍କୁ ମିଳିବ ଅତ୍ୟାଧୁନିକ ସୁବିଧା ସୁଯୋଗ। ଏକ ସ୍ୱତନ୍ତ୍ର ମାଷ୍ଟର ପ୍ଲାନ ଅନୁସାରେ ଏହି ନୂଆ ହାଟର ନିର୍ମାଣ କରାଯିବ। ଏନେଇ ନଗର ଉନ୍ନୟନ ମନ୍ତ୍ରୀଙ୍କ ପକ୍ଷରୁ ଗୁରୁତ୍ୱପୂର୍ଣ୍ଣ ସୂଚନା ମିଳିଛି।
ରିପୋର୍ଟ: ସୂଚନାନୁଯାୟୀ, ୪ ନମ୍ବର ମାର୍କେଟକୁ ଅଧିକ ସ୍ୱଚ୍ଛ, ସୁବ୍ୟବସ୍ଥିତ ଏବଂ ଆଧୁନିକ କରିବା ପାଇଁ ସରକାର ବଡ଼ ପଦକ୍ଷେପ ନେବାକୁ ଯାଉଛନ୍ତି। ମନ୍ତ୍ରୀଙ୍କ ସୂଚନା ଅନୁସାରେ, ଏଣିକି ମାର୍କେଟରେ ଆମିଷ ଏବଂ ପରିବା ବଜାର ସମ୍ପୂର୍ଣ୍ଣ ଅଲଗା ଅଲଗା ସ୍ଥାନରେ କାର୍ଯ୍ୟ କରିବ। ଯାହାଫଳରେ ବଜାରକୁ ଆସୁଥିବା ଗ୍ରାହକମାନେ କୌଣସି ଅସୁବିଧାର ସମ୍ମୁଖୀନ ହେବେ ନାହିଁ ଏବଂ ପରିମଳ ବ୍ୟବସ୍ଥାରେ ମଧ୍ୟ ବଡ଼ ସୁଧାର ଆସିବ।
ଏହା ସହିତ ଗତ ୨୫ ବର୍ଷ ହେବ ବନ୍ଦ ହୋଇ ପଡ଼ି ରହିଥିବା ପ୍ରସିଦ୍ଧ ପଞ୍ଚଦେବ ମାର୍କେଟର ମଧ୍ୟ ପୁନରୁଦ୍ଧାର କରାଯିବ ବୋଲି ମନ୍ତ୍ରୀ ଘୋଷଣା କରିଛନ୍ତି। ଦୀର୍ଘ ବର୍ଷ ଧରି ଅବହେଳିତ ଅବସ୍ଥାରେ ଥିବା ଏହି ମାର୍କେଟର ପୁନଃ ନିର୍ମାଣ କରାଯାଇ ଏହାକୁ ପୁଣିଥରେ କାର୍ଯ୍ୟକ୍ଷମ କରାଯିବ, ଯାହା ସ୍ଥାନୀୟ ବ୍ୟବସାୟୀଙ୍କ ପାଇଁ ଏକ ବଡ଼ ଆଶ୍ୱସ୍ତି ଆଣିଦେଇଛି।
ଅନ୍ୟପଟେ, ଏହି ମାର୍କେଟ ପ୍ରକଳ୍ପ ଏବଂ କାର୍ଯ୍ୟକଳାପରେ ହୋଇଥିବା ଦୁର୍ନୀତିକୁ ନେଇ ସରକାର କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ଏହି ମାର୍କେଟରେ ହୋଇଥିବା ସମସ୍ତ ଅନିୟମିତତା ଓ ଦୁର୍ନୀତିର ଉଚ୍ଚସ୍ତରୀୟ ତଦନ୍ତ କରାଯିବ। ଏଥିରେ ସମ୍ପୃକ୍ତ ଥିବା ଦୋଷୀମାନଙ୍କୁ କୌଣସି ପରିସ୍ଥିତିରେ ଛଡ଼ାଯିବ ନାହିଁ ଏବଂ ସେମାନଙ୍କ ବିରୋଧରେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଦଣ୍ଡିତ କରାଯିବ ବୋଲି ସ୍ପଷ୍ଟ ଚେତାବନୀ ଦିଆଯାଇଛି।
ମାଷ୍ଟର ପ୍ଲାନ ଅନୁସାରେ ୪ ନମ୍ବର ମାର୍କେଟ୍ର ଏହି ନୂଆ ରୂପରେଖ ରାଜଧାନୀର ବ୍ୟବସାୟିକ କ୍ଷେତ୍ରକୁ କେତେ ସୁଦୃଢ଼ କରୁଛି ଏବଂ ଦୁର୍ନୀତିଗ୍ରସ୍ତଙ୍କ ବିରୋଧରେ କିଭଳି କାର୍ଯ୍ୟାନୁଷ୍ଠାନ ହେଉଛି, ତାହା ଉପରେ ସମସ୍ତଙ୍କ ନଜର ରହିବ
