ଭୁବନେଶ୍ୱର, ୪ ଅକ୍ଟୋବର ୨୦୨୬: ଆଗାମୀ OMC ପୁରୀ କୋଷ୍ଟାଲ୍ ମାରାଥନ୍କୁ ନେଇ ରାଜଧାନୀ ଭୁବନେଶ୍ୱରରେ ଆୟୋଜିତ ହୋଇଛି ଏକ ଉତ୍ସାହଭରା ପ୍ରୋମୋ ରନ୍। ଏଥିରେ ବହୁ ସଂଖ୍ୟାରେ ରନର୍, ଫିଟନେସ୍ ପ୍ରେମୀ ଓ ସାଧାରଣ ନାଗରିକ ସାମିଲ ହୋଇ ମାରାଥନ୍ ପାଇଁ ଉତ୍ସାହ ସୃଷ୍ଟି କରିଛନ୍ତି।
ପ୍ରୋମୋ ରନ୍କୁ ଫ୍ଲାଗ୍ ଅଫ୍ କରିଥିଲେ ଓଡ଼ିଶାର ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା, ଦିଗପହଣ୍ଡି ବିଧାୟକ ଶ୍ରୀ ସିଦ୍ଧାନ୍ତ ମହାପାତ୍ର, କମିଶନର-କମ୍-ସଚିବ ଶ୍ରୀ ବଳବନ୍ତ ସିଂହ, କ୍ରୀଡ଼ା ଓ ଯୁବସେବା ବିଭାଗର କମିଶନର-କମ୍-ସଚିବ ଶ୍ରୀ ଭୂପେନ୍ଦ୍ର ସିଂହ ପୁନିଆ ଏବଂ ପର୍ଯ୍ୟଟନ ନିର୍ଦ୍ଦେଶକ ଶ୍ରୀ ଦୀପଙ୍କର ମହାପାତ୍ର।
ଏହି ପ୍ରୋମୋ ରନ୍ର ଉଦ୍ଦେଶ୍ୟ ହେଉଛି ଲୋକଙ୍କ ମଧ୍ୟରେ ଦୌଡ଼ ଓ ସୁସ୍ଥ ଜୀବନଶୈଳୀ ପ୍ରତି ଆଗ୍ରହ ବଢ଼ାଇବା ସହ ଆଗାମୀ ପୁରୀ କୋଷ୍ଟାଲ୍ ମାରାଥନ୍ ପାଇଁ ବ୍ୟାପକ ସଚେତନତା ସୃଷ୍ଟି କରିବା।
ପୁରୀର ମନୋରମ ସମୁଦ୍ରକୂଳରେ ଆୟୋଜିତ ହେବାକୁ ଥିବା OMC Puri Coastal Marathonରେ ଫିଟନେସ୍, ସାମୂହିକ ଅଂଶଗ୍ରହଣ ଓ ପର୍ଯ୍ୟଟନର ଏକ ନିଆରା ସମନ୍ୱୟ ଦେଖିବାକୁ ମିଳିବ। ଏହା ମାଧ୍ୟମରେ ପୁରୀକୁ ଏକ ପ୍ରମୁଖ ସ୍ପୋର୍ଟସ୍ ଓ ଆକ୍ଟିଭ୍ ଟୁରିଜିମ୍ ଡେଷ୍ଟିନେସନ୍ ଭାବେ ପ୍ରୋତ୍ସାହିତ କରିବା ଲକ୍ଷ୍ୟ ରହିଛି।
ଭୁବନେଶ୍ୱରର ଏହି ପ୍ରୋମୋ ରନ୍ ମାରାଥନ୍ ପୂର୍ବରୁ ଚାଲିଥିବା ବ୍ୟାପକ ପ୍ରଚାର ଅଭିଯାନର ଏକ ଅଂଶ। ରାଜ୍ୟର ବିଭିନ୍ନ ଅଞ୍ଚଳ ସହ ଦେଶର ବିଭିନ୍ନ ସ୍ଥାନର ରନର୍ମାନଙ୍କୁ ଏହି ମାରାଥନ୍ରେ ସାମିଲ ହେବାକୁ ଉତ୍ସାହିତ କରାଯାଉଛି।
ଫିଟନେସ୍ ଓ ରନିଂ କମ୍ୟୁନିଟି ମଧ୍ୟରେ ବଢ଼ୁଥିବା ଉତ୍ସାହ ସହ OMC ପୁରୀ କୋଷ୍ଟାଲ୍ ମାରାଥନ୍ କ୍ରୀଡ଼ା, ସ୍ୱାସ୍ଥ୍ୟ, ସାମୂହିକ ଅଂଶଗ୍ରହଣ ଓ ପୁରୀର ସମୁଦ୍ରକୂଳର ଆକର୍ଷଣକୁ ଏକାଠି କରିବାକୁ ଯାଉଛି।
